सडक निर्माणको मांग गर्दै विद्यार्थी सडकमा

लोक सम्वाददाता
जनकपुरधाम, असार १९ गते ।
सडक निर्माणमा लापरवाही गरिएको भन्दै स्थानीय युवा र विद्यार्थीहरुले संयुक्त रुपमा महोत्तरी जिल्लाको केन्द्र जलेश्वरको प्रवेशद्वार जिरोमाइलमा दुई घण्टा चक्काजाम गरेका छन् ।
उनीहरुले समयमै सडक निर्माण कार्य अघि नबढाइएको कारण सर्वसाधारणलाई गर्मीयाममा धुलो र बर्षातमा हिलोको समस्या भोग्नु परिरहेको दुखेसो पोख्दै बिहीवार बिहान १० बजेदेखि १२ बजेसम्म दुई घण्टा चक्काजाम गरेका हुन ।
जलेश्वर—जनकपुर सडक र जलेश्वर नगरपालिका बजार क्षेत्र भित्र रहेको एडिबी परियोजना अन्तर्गतको सडक समयमै बन्न नसकेकको कारण धुलाले सर्वसाधारणको जनजीवन कष्टकर बन्न गएको छ ।
पटक पटकको ताकेता पश्चात बितेको वैशाख महिनामा प्रमुख जिल्ला अधिकारी समक्ष सम्बन्धित ठेकेदारले स्थानीयवासीको रोहबरमा जेठ १५ गते भित्रै सडकको पिचमा कालेपत्रे गरिसक्ने प्रतिबद्धता सहितको सम्झौता गरेको थियो तर सम्झौतालाई लत्याउंदै काम अगाडि बढाउन नसक्दा तिनीहरु आन्दोलनमा उत्रेका हुन ।
रोसन कन्स्ट्रक्सन हिरा भगतले ठेक्का लिएको छ । ठेकेदारको मनपर्दीले तोकिएको म्यादभित्र सडक निर्माण हुन नसक्दा वर्षातमा आवातजावत समेत बन्द र सुख्खायाममा धुलो धुवांका कारण स्वाथ्य अवस्थामा प्रतिकुल असर पार्दै आएको स्थानीयको आरोप छ ।
नेपाल विद्यार्थी संघ महोत्तरीका अध्यक्ष आशुतोष झाले दुई भित्र सडक निर्माणको कार्य पुनः सुचारु नगरिए चक्काजामलाई निरन्तरता दिदै कडा आन्दोलनमा जाने चेतावनी दिएका छन ।