लोक सम्वाददाता
जनकपुरधाम, असार १७ गते ।
पत्रकारहरुको हकहित र वृति विकासका लागि संघीय सरकार भन्दापनि बढी क्रुर प्रदेश २ र स्थानीय सरकार भएको आरोप पत्रकारहरुले लगाएका छन् ।
भूमिजा मिडिया प्रा.लि. दारा धनुषा क्षेत्र नं. ३ को ख का प्रदेश सभा सदस्य परमेश्वर साहको सहयोगमा आयोजित संघीय संरचनामा पत्रकारहरुको वृति विकास र संचार संस्थाको दिगो विकास सम्बन्धी एक दिवसीय गोष्ठीमा सहभागी पत्रकारहरुले यस्तो आरोप लगाएका हुन् ।
कार्यक्रममा पत्रकारहरुले संघीय सरकारले पत्रकारहरुसंग विभेद गर्दै नै आएको थियो तर, प्रदेश र स्थानीय सरकार त्यो भन्दा पनि बढी क्षमता अभिवृद्धि र पत्रकारिता पेशामाथि दमन शोषण दमन गर्दै क्रुर प्रवृति देखाएको भने । उनीहरुले देशको नयाँ संरचनामा प्रदेश र स्थानीय सरकारबाट पत्रकारको आवरणमा रहेका गलत व्यक्तिहरुलाई सहयोग गर्ने र पत्रकारिता पेशामा संघर्षशीललाई उपेक्षा गर्दै आएको आरोप लगाए ।
कार्यक्रममा वरिष्ठ पत्रकार राजेश्वर नेपालीले पत्रकारहरुको वृति विकास र क्षमता अभिवृद्धिका लागि प्रादेशिक पत्रकारिता प्रशिक्षण केन्द्र, प्रादेशिक संचार माध्यमको स्थापना र समानुपातिक विज्ञापन निती ल्याउनुपर्ने माँग गरे ।
कार्यक्रममा नेपाल पत्रकार महासंघ धनुषाका अध्यक्ष अनिल मिश्रले पत्रकारहरुको सहयोगले स्थापना भएको प्रदेश र स्थानीय सरकारले पत्रकारिता पेशालाई संरक्षण गर्न कुनै सहयोग नगरेको आरोप लगाए ।
उनले पेशागत संघ संगठनलाई लत्याउंदै पत्रकारिता प्रशिक्षण सहितका विभिन्न योजनाको नाममा लाखौलाख रुपैया पत्रकारको नाममा गलत व्यक्तिलाई बांडेर दुरुपयोग गरेको आरोप लगाए ।
सो कार्यक्रममा प्रमुख अतिथि प्रदेश सभा सदस्य परमेश्वर साहले पत्रकारहरुको हकहित र संरक्षणका लागि आफू सदैव सहयोग गर्ने प्रतिबद्धता जनाउंदै सदन र सरकारमा समेत पत्रकारहरुको क्षमता अभिवृद्धि र समानुपातिक विज्ञापन प्रणाली निति लागू गर्न आफ्नो तर्फबाट आवाज उठाउने बताए ।
कार्यक्रममा नेपाल पत्रकार महासंघ प्रदेश २ का महासचिव किरण कर्ण, सामुदायिक रेडियो प्रसारक संघका अशोक दत्त मधेशी पत्रकार समाज धनुषाका सुभाष कर्ण, प्रेस चौतारीका अवधेश कामत, प्रेस युनियनका राजन सिंह, संघीय प्रेस फोरमका अर्जुन मण्डल लगायत एक दर्जनभन्दा बढी पत्रकारहरुले आ आफ्ना धारणा राखेका थिए ।
यो विषयमा आफ्नो प्रतिक्रिया दिनुहोस् !