लोक सम्वाददाता
बिरगंज, असार १७ गते।
बारा प्रहरीले जिल्लाको जीतपुर सिमरा उपमहानगर पालिकाको सामुदायिक विद्यालयका एक प्रधानाध्यापकलाई ६१ लाख भन्दा बढी रकम ठगी गरेको आरोपमा पक्राउ गरेको छ ।
उपमहानगरपालिकाको वडा नम्बर ८ स्थित सामुदायिक प्राथमिक विद्यालय सगरदिनाका प्रधानध्यापक अनिल ठाकुरलाई इलाका प्रहरी कार्यालय सिमराले ६१ लाख १४ हजार ५ सय रुपैयाँ ठगी गरेको आरोपमा पक्राउ गरेको जनाईएको छ ।
रौतहटको माधवनारायण नगरपालिकाको ६ घर भइ हाल वीरगन्ज महानगरपालिकाको ३२ विद्यानगरटोलमा बस्दै आएका ठाकुर आफ्नै विद्यालयमा शिक्षकमा जागिर लगाईदिने भन्दै विभिन्न व्यक्तिहरुसित २ लाखदेखि ५ लाख सम्म रकम ठगी गरेको आरोप लगाइएको छ ।
ठाकुरले २० जनासंग प्रतिव्यक्ति २ लाखदेखि ५ लाखसम्म ठगी गरेको उजुरी परेको इलाका प्रहरी कार्यालयका प्रमुख प्रहरी नायब उपरीक्षक (डीएसपी)गोविन्द पुरीले जनाए ।
ठाकुरले ठगी गरेका व्यक्तिहरुले रकम फिर्ता मागेपछि उनले रकम नरहेको खाताको चेक दिएर लुकिछिपी बस्दै आएका थिए । पीडितहरुले गरेको उजुरीमा बाउन्स भएका चेकहरु समेत रहेको डीएसपी पुरीले जनाए ।
उजुरीको अधारमा ठाकुरलाई खोजी गर्ने क्रममा जीतपुरबाट पक्राउ गरी कारवाही थालिएको पुरीले बताए ।
यो विषयमा आफ्नो प्रतिक्रिया दिनुहोस् !