१० प्रतिशत पनि खर्चिन नसकेको प्रदेश २ ले ५ अर्ब थपेर बजेट ल्याउंदै

जनकपुरधाम, जेठ २४ गते ।
प्रदेश २ सरकारले अगामी आर्थिक वर्ष २०७६/०७७ का लागि ३५ अर्बको अनुमानित बजेट ल्याउने भएको छ ।
चालु आर्थिक वर्षमा कुल बजेटको १० प्रतिशत पनि खर्च गर्न नसकेको सरकारले आगामी आ.ब.का लागि सोही योजनालाई निरन्तरता दिँदै केहि थप गरेर असार १ गते बजेट ल्याउने तयारी गरेको छ ।
चालु आर्थिक वर्ष ०७५/०७६ मा करिब ३० अर्ब रुपैयाँ बराबरको बजेट ल्याएको थियो भने आउँदो आर्थिक वर्षमा ५ अर्ब बढेर अनुमानित ३५ अर्ब रुपैयाँको बजेट ल्याउने तयारी भइरहेको मुख्यमन्त्री तथा मन्त्रिपरिषदको कार्यालयले जनाएको छ ।
मुख्य मन्त्रिपरिषद कार्यालयले प्रदेश सरकारले आगामी असार १ गते प्रदेशसभामा अनुमानित ३५ अर्ब रुपैयाँको कूल बजेटका कार्यक्रमहरू प्रस्तुत गर्ने कार्यक्रम रहेको जनाएको छ । प्रदेश सरकारले आगामी वर्षको बजेटमा जनकपुर–वीरगञ्ज–राजविराजसम्म प्रादेशिक पारवहन अन्तर्गत सार्वजनिक बस सेवा सञ्चालनमा ल्याउन लागेको छ ।
प्रदेश सरकारले ल्याउन लागेको बजेटमा सडक बोर्ड गठन गरी पारवहन कार्यविधि जारी गरी प्रदेशको ८ जिल्लालाई एक अर्कासँगको समन्वय तथा सहकार्य हुने खालका मुख्य राजमार्गमा प्रादेशिक बस सेवा सञ्चालन गर्ने योजना समेटेको छ । प्रदेश सरकारको प्राथमिकतामा कृषि, धार्मिक पर्यटन, सडक, सिचाई र विद्युत लगायतका महत्वकांक्षी योजनाहरुसमेत राखेको छ ।
प्रदेश सरकारले लगानी गर्ने क्षेत्रलाई पहिचान गरी लगानी गर्नतर्फ प्रदेश सरकारको बजेट केन्द्रित हुने बताइएको छ । जस्तैः कृषि उपज बढाउन सिँचाइका स्रोतको रूपमा डीप ट्युबवेल र बोरिङहरूको योजना प्रदेश सरकारले अगामी वर्षको बजेटमा राखिएको जनाइएको छ ।
प्रदेशमा पर्यटन विकास तथा प्रवद्र्धनका लागि धार्मिक पर्यटनको क्षेत्रमा एउटा पालिकाबाट अर्को पालिकासम्म जोड्ने बाटो र सडक निर्माणको काम तथा सप्तरीको सखडादेखि सहलेश र बाराको गढीमाई हुँदै पर्साको रामभौरीभाठा हुँदै ठोरीसम्म पर्यटनको उपयुक्त गन्तव्य सम्म पुग्ने सडक निर्माण गर्ने नीति रहेको छ ।
प्रदेशका ८ जिल्लाका पूर्वपश्चिम राजमार्ग क्षेत्रका विभिन्न पालिकासँग जग्गा लिइने छ भने थप कार्ययोजना बनाई कार्यक्रम अघि बढाउने लगायतका कार्यक्रम समावेश गरिएको छ । चालू आर्थिक वर्षको ५० मेगावाटको सोलार केन्द्रका सम्बन्धमा सम्भाव्यताको अध्ययन भइसकेको र चौधरी समूहसँग एमओई पनि भइसकेको बताइएको छ ।