जनकपुरधाम जहाँ १५ हजार तिरेमा फेल भएपनि लाइसेंस पाइन्छ

जनकपुरधाम, जेठ ४ गते ।
प्रदेश २ को राजधानी जनकपुरधाम जहाँ १५ हजारदेखि २५ हजारसम्म रकम खर्च गरे सवारी चालक अनुमति पत्र सहज तरिकाले पाइन्छ ।
दलालहरुको सेटिंगमा यातायात व्यवस्था कार्यालय जनकपुरले सवारी लाइसेन्सको ट्रायलमा रकमको आधारमा मिलाएर पास गराउने गरेको पाइएको छ ।
यातायात कार्यालयले सेटिंगको आधारमा कसलाई पास गर्ने र कसलाई फेल गर्ने भन्ने कुरा पहिला नै तय गरिसकेको हुन्छ भन्ने कुरा कार्यालयकै एक कर्मचारीले नाम नबताउने शर्तमा जनाएको छ ।
लामो लाइनमा बसेर बल्लतल्ल पुगेका सेवाग्राहीहरुले ट्रायल लिन बसेकाहरुबाट हैरानी मात्र खेप्नु पर्दैन, उनीहरुको सेटिङमा नपरेकाहरुलाई अभद्र व्यवहार गर्दै फेल गराउने सम्मको काम गर्ने गरेको सेवाग्राही भाग्य अशोक यादवले बताए ।
यातायात व्यवस्था कार्यालय जनकपुरमा दलाल, कर्मचारी र ट्राफिक प्रहरीबीच सेटिङ मिलाएर काम गर्ने क्रम बढेपछि सेटिंगमा नपरेका सेवाग्राहीहरुलाई सास्ती पाउने गरेका छन् । केही समययता दलाल, कर्मचारी र ट्राफिक प्रहरीबीच मिलोमतो बढेपछि कोटामा आधारित वितरण गरिने सवारी चालक लाइसेंसबाट अधिकांश सेवाग्राहीहरु वंचित हुने गरेको छ ।
इमानदारीपूर्वक लाइनमा बसेर सेवा प्राप्त गर्न चाहने सेवाग्राहीले प्रायः यहाँका कर्मचारीको हप्कीदप्की र अभद्र व्यवहारको सामना गर्नुपरेको भने दलालको सेटिंगमा गएकालाई १५ देखि २५ हजार रुपैयासम्म तिरिसकेपछि केही गर्नुपर्दैन मात्र ट्रायल दिन उपस्थित हुनुपर्छ ।
रकम तिरेपछि रकम तिर्ने व्यक्तिलाई ट्रायलमा प्रयोग गर्न कार्यालयका कर्मचारी तथा सेटिङ्गकर्ताहरुले नै कन्डिसनमा रहेको गाडी उपलब्ध गराउँछन् । त्यस्तो गाडी उपलब्ध गराउने वित्तिकै सबै कर्मचारीहरुले बुझिहाल्छन् कि त्यो व्यक्तिले रकम तिरेको छ ।
त्यसपछि उक्त व्यक्तिलाई ट्रायलको हरेक स्टेजमा नजिकै रहेका सम्बन्धित कर्मचारीले मौखिक रुपमा ठूलो मद्दत गर्छन् । तिनीहरु फेल भएपनि केही रकम अझै थप्नु पर्ने हुन्छ ।
रकम तिर्नेले गलती गरेपनि त्यसलाई नजरअंदाज गर्ने र रकम नतिर्नेलाई स साना गलती निकालेर फेल गर्ने गरेको सहभागी सेवाग्राहीहरुको आरोप छ ।
यस सम्बन्धमा जिज्ञासा राख्दा निमित्त कार्यालय प्रमुख अजिम मन्सुरले कार्यालयमा सेवाग्राही संँग एक रुपैया पनि नलिएको दाबी गरे । उनले भने दलाललाई भित्र प्रवेश निषेध छ, बाहिर अब कुन सेवाग्राहीले के गर्छ भन्ने कुरा आफूलाई थाहा हुदैन ।
केही दिनअघि लाइसेंस बनाउने दलाल पक्राउ समेत परेको थियो । तर के कति कारवाही भयो बारे कुरा सार्वजनिक हुन सकेको छैन ।