खुनडाँका फरार अभियुक्त पक्राउ

मलंगवा, जेठ ४ गते ।
सर्लाही प्रहरीले खुनडाँका, संगठित अपराध र किर्ते मुद्धामा फरार अभियुक्तलाई पक्राउ गरेको छ ।
सर्लाही, महोत्तरी, सिन्धुली, सिरहा तथा भारतका विभिन्न स्थानमा खुनडाँका तथा संगठित अपराध गरी फरार रहदै आएका जिल्लाको लालबन्दी निवासी ४५ वर्षिय संजिव पासवानलाई प्रहरीले घरबाटै पक्राउ गरेको छ ।
गत मंसिर २० गते सर्लाहीको इश्वरपुर नगरपालिका १३ स्थित हरिपुर, नगरपालिका ७ का धनेश्वर महतोको पैसा लुटेर फरार भएका संजिव प्रहरीको खोजी सूचीमा रहेको थियो । पैसा लुटेर फरार रहेका पासवानलाई ६ महिनादेखि प्रहरीले खोज्दै गोप्य सूचनाको आधारमा प्रहरीले घरबाटै पक्राउ गरेको जिल्ला प्रहरी कार्यालय सर्लाहीका प्रहरी नायव उपरीक्षक प्रतित सिंह राठौरले जनाएको छ ।
करीब डेढ वर्ष अगाडी कविलासी नगरपालिका २ का सुनिल साहको हत्या गरी सुन र चाँदीको गरगहना लुटपाट घटनामा पनि उनको संलग्नता रहेको प्रहरीले भनाई छ । पासवान विरुद्ध महोत्तरीमा दुईवटा डाँका र एउटा सरकारी कागज किर्ते गरेको मुद्धा दर्तामा रहेको प्रहरी नायव उपरीक्षक राठौरले बताए । सिन्धुली र सिरहामा एक–एक डाँका मुद्धा उनको विरुद्ध दर्तामा रहेको बुझिएको छ ।
२०५८ सालमा रुपन्देहीको भैरहवामा डाँका गरेको आरोपमा पक्राउ परी साढे तीन वर्ष जेल सजाय समेत भोगेका पासवानले भारतको विभिन्न शहरमा एक दर्जन भन्दा बढी डाँका गरेको प्रहरीले दाबी छ । पासवान २० वर्षको उमेरदेखि नै पेशेवर डाँकाको रुपमा अपराध गर्दै आएको अनुसन्धानमा खुलेको प्रहरीको भनाई छ ।