बालविवाह गराउदै गर्दा ५ पक्राउ

जनकपुरधाम, वैशाख १२ गते ।धनुषा प्रहरीले बालविवाह गराउन खोज्ने ५ जनालाई जनकपुरधामबाट पक्राउ गरेको छ ।
प्रहरीले जनकपुरधाम स्थित रामजानकी मन्दिरमा सिरहाको ५० वर्षिय बेहुलासंग एक १९ वर्षिय किशोरीको विवाह गराउन खोज्दा बालविवाह आरोपमा तिनीहरुलाई पक्राउ गरेको जनाइएको छ ।
प्रहरीले जनाए अनुसार सिरहाको बरियारपट्टि गाउँपालिका ५ हरिपुरका ५० वर्षीय जिबेन्द्र नारायण यादवसँग सोही जिल्लाको औरही गाउँपालिका ३ का हरी नारायण यादवकी १९ वर्षीय छोरी विभा कुमारी यादवको विवाह गराउन लागेको क्रममा प्रहरीले थाहा पाएपछि उनीहरुलाई पक्राउ गरिएको हो ।
पक्राउ पर्नेमा बेहुलीका बुवा, ठूलो बुवा, दाजु र बेहुला पक्षका दुई जना गरी कुल ५ जनालाई मण्डपबाटै पक्राउ गरेको जिल्ला प्रहरी कार्यालय धनुषाले जनाएको छ । बुधवार राति भएको सो घटना बारे प्रहरीले अनुसन्धान भइरहेको भनी पक्राउ पर्नेहरुको नाम सार्वजनिक गरेन ।
तर बिहीवार बिहान आरोपितहरुले अबदेखि कानून उल्लंघन नगर्ने भनी लिखित प्रतिबद्धता जनाएपछि छाडिएको जिल्ला प्रहरी कार्यालय धनुषाका प्रहरी नायब उपरिक्षक रामेश्वर कार्कीले जनाएको छ ।