जनकपुरधाम, वैशाख ८ गते ।
जनकपुरधाम उपमहागरपालिकाका मेयर लालकिशोर साहले संंघीय सरकारको निर्देशनलाई बेवास्ता गर्दै अमेरिका भ्रमण गरेका छन् । स्थानीय तहको प्रतिनिधि विदेश भ्रमणका लागि जाँदा संघीय सरकारसँग स्वीकृति लिनुपर्ने प्रावधान छ ।
तर मेयर साहले सरकारको स्वीकृतिबिनै ११ दिने अमेरिका भ्रमण गरेका हुन् । उनी नेपाली कन्सुलेट जनरल न्यूयोर्क र नेप्लिज अमेरिकन फाउण्डेशनद्वारा आयोजित मिथिला महोत्सवमा प्रमुख अतिथि बनेर गत चैत १८ गते त्यसतर्फ गएको भन्ने समाचार द नेपालटपमा प्रकाशित छ ।
संघीय मामिला तथा सामान्य प्रशासन मन्त्रालयको २०७५ जेठ २५ गतेको निर्णयअनुसार कुनै पनि स्थानीय तहका प्रतिनिधि विदेश भ्रमणमा जाँदा केन्द्रको स्वीकृति लिनुपर्छ । मन्त्रालयले भ्रमण नियमावली स्वीकृत नभएसम्म स्थानीय तहका पदाधिकारी र कर्मचारीले औचित्य, सान्दर्भिकता, मितव्ययीता र पदीय मर्यादासमेत ख्याल गरी वैदेशिक भ्रमणको निर्णय गर्नुपर्ने र अनिवार्य रूपमा मन्त्रालयबाट स्वीकृत गरेर मात्रै भ्रमण गर्नुपर्ने गरी निर्देशन जारी गरेको थियो ।
तर मेयर साह सो निर्देशनलाई बेवास्ता गर्दै सुटुक्क अमेरिका पुगेर फर्किएका हुन् । उनको भ्रमणबारे सम्बन्धित मन्त्रालयलाई कुनै जानकारी गराइएको थिएन । मेयर साहले गरेको अमेरिका भ्रमणबारे मन्त्रालयले पनि कुनै चासो लिएको छैन ।
विदेश भ्रमणको कानुनी व्यवस्था
— स्थानीय सरकार सञ्चालन ऐन २०७४ को दफा ११४ र ११७ को व्यवस्था बमोजिम विदेश भ्रमण वा विदेशी मुलुकसँग सम्पर्क गर्दा स्थानीय तह पदाधिकारीले मन्त्रालयमार्फत सम्पर्क गर्नुपर्नेछ ।
— स्थानीय तहका पदाधिकारी तथा कर्मचारीहरूको वैदेशिक भ्रमणसम्बन्धी विषय सम्बन्धित स्थानीय तहबाट निर्णय भई मनोनयनका लागि मन्त्रालय आउने र स्वीकृति दिने या नदिने निर्णय गर्ने कानुनी व्यवस्था छ ।
— विदेश भ्रमण सम्बन्धी कार्य्विधि बन्नुअघि मन्त्रालयको पूर्वस्वीकृति लिएर मात्र भ्रमणमा जान पाउने व्यवस्था छ ।
— कार्य्विधि नबन्दासम्म भ्रमण भएको मुलुक, सहभागी पदाधिकारीको नाम थर, आयोजक संस्था, भ्रमणको उद्देश्य र अवधि, वित्तीय स्रोत व्यवस्थापन, भ्रमणमा प्रयोग गरिएको राहदानी र भ्रमण कुन तहबाट कुन कानुनका आधारमा भएको हो, खुलाएर मन्त्रालयबाट पूर्वस्वीकृति लिनुपर्ने ।
— नेपाल सरकारको कार्य विभाजन नियमावली २०७४ को बुँदा ८ मा स्थानीय तहका पदाधिकारी र कर्मचारीको वैदेशिक भ्रमणसम्बन्धी नीति, कानुन र मापदण्ड बनाउने कार्यक्षेत्र संघीय मामिला तथा सामान्य प्रशासन मन्त्रालयलाई तोकिएको छ ।
गैरकानुनी भ्रमणलाई सफल दाबी
संघीय सरकारको निर्देशन र कानुनी व्यवस्थालाई बेवास्ता गर्दै भ्रमणमा गएका साहले पत्रकार सम्मेलन नै गरेर आफ्नो भ्रमण सफल भएको दाबी गरेका छन् । आफूले गरेको भ्रमण क्रममा भगिनी सम्बन्धका लागि प्रयास गरिएको र सो प्रयास जनकपुरधामको लागि उपलब्धिमूलक रहेको उनको भनाइ छ ।
पत्रकार सममेलनमै सम्बन्धित निकायमा जानकारी नदिई गरिएको भ्रमण बारे प्रश्न उठेको थियो । त्यसको जवाफमा जनकपुरधामका मेयरको रूपमा कार्यक्रममा सहभागी भएर फर्किएका साहले आफू निजी भ्रमणमा गएको तर्क गरेका थिए ।
उनले मेयरको हैसियतले न्युयोर्कमा आयोजना भएको मिथिला महोत्सवको उद्घाटन गरेका थिए ।
वैदेशिक भ्रमण निर्दे्शिका २०७५ मा सरकारी बिदा लिएर कुनै ठेकेदार, परामर्शदाता वा गैरसरकारी संस्थाको खर्चमा सरकारी प्रतिनिधिहरूको हैसियतमा विदेश भ्रमणमा जान नहुने व्यवस्था छ । तर उनी बिदा लिएर मेयरको हैसियतमा न्युयोर्क पुगेर फर्किएका हुन् ।
यसअघि रोकिएको थियो साहको विदेश भ्रमण
यसअघि मन्त्रालयले एसियाली विकास बैङ्क (एडीबी) को खर्चमा भारतको इन्दौर र नयाँ दिल्लीमा हुने फोहोर व्यवस्थापन सम्बन्धी कार्यशालामा जान लागेका मेयर साहसहित १९ जना प्रतिनिधिको भ्रमण रोकिदिएको थियो ।
उक्त भ्रमणमा मेयर साह सहित विराटनगर महानगरपालिकाका उपप्रमुख इन्दिरा कार्की, मोरङको बूढीगंगा गाउँपालिका अध्यक्ष बालचन्द्र माझी, बूढीगंगा ७ का वडा अध्यक्ष मुरालीलाल विश्वास थारू, वीरगन्ज महानगरपालिकाकी उपप्रमुख शान्ति कार्की, सिद्धार्थनगर नगरपालिकाका प्रमुख हरिप्रसाद अधिकारी, प्रमुख प्रशासकीय अधिकृत ख्यामबहादुर थापा र सामाजिक विकास अधिकृत यादवप्रसाद सापकोटा लगायतको नाम सिफारिस भएको थियो ।
बोर्डको निर्णय बिनाको भ्रमण
कुनै पनि स्थानीय प्रतिनिधि विदेश भ्रमणमा जाँदा कार्यपालिका बोर्डबाट निर्णय गराएर सम्बन्धित मन्त्रालयबाट स्वीकृति लिनुपर्ने प्रावधान छ । तर मेयर साहले मन्त्रालयबाट स्वीकृति त लिएनन् नै, बोर्डबाट पनि कुनै निर्णय गराएनन् । उनी मौखिक जानकारी मात्र दिएर भ्रमणमा गएका थिए । साभार ः द नेपालटप
यो विषयमा आफ्नो प्रतिक्रिया दिनुहोस् !