कर्मचारी भर्ना नगर्न आयोगलाई प्रदेश २ को आग्रह

जनकपुरधाम, प्रदेश २ का मुख्यमन्त्री लालबाबु राउतले प्रदेशस्तर र स्थानीय तहमा कर्मचारी भर्ना नगर्न लोकसेवा आयोगसँग आग्रह गरेका छन् ।
मुख्यमन्त्री राउतले मंगलवार एक पत्र लेखेर आयोगलाई प्रदेश स्तर र स्थानीय तहमा कर्मचारी भर्ना गर्न पाउने अधिकार प्रदेश सरकारमा संवैधानिक अधिकार निहित रहेकोले कर्मचारी भर्ना नगर्न आग्रह गरेको छ ।
सो पत्रमा संविधानको धारा २२७ मा गाउँपालिका र नगरपालिकाको कर्मचारी र कार्यालय सम्बन्धी अन्य व्यवस्थापन प्रदेश कानून बमोजिम हुने व्यवस्था रहेको र धारा २८५ को उपधारा ३ मा प्रदेश मन्त्रिपरिषद, गाउँ कार्यपालिका र नगर कार्यपालिकाले आफ्नो प्रशासन संचालन आवश्यकता अनुसार कानून बमोजिम विभिन्न सरकारी सेवाहरुको गठन र संचालन गर्ने व्यवस्था रहेको उल्लेख छ ।
साथै संवैधानिक व्यवस्था अनुसार प्रदेश २ मा विधेयक पारित हुने अन्तिम चरणमा रहेको आयोग गठन तयारीको क्रममा रहेको जानकारी गराउंदै प्रदेशस्तर र स्थानीय तहमा कर्मचारी भर्ना सम्बन्धी विज्ञापन नगर्न अनुरोध मुख्यमन्त्री राउतले गरेको छ ।