विचार र सिद्धान्तमा एकमत भएर आउन राजपालाई उपाध्यक्ष यादवको आग्रह

जनकपुरधाम, संघीय समाजवादी फोरम नेपालका उपाध्यक्ष रेणु यादवले राजपा सँग एकीकरण गर्न फोरम नेपाल तयार रहेको बताउंदै अध्यक्ष मण्डलका सदस्यहरुले विचार र सिद्धान्तमा एकमत भएर आउन आग्रह गरेकी छिन् ।
मंगलवार जनकपुरधाम उपमहानगरपालिका नगर अधिवेशनको उद्घाटन सत्रलाई सम्बोधन गर्दै प्रमुख अतिथि उपाध्यक्ष यादवले पछिल्लो निर्वाचनको स्मरण गर्दै भनिन् मात्र चुनावी एकीकरणले हामी प्रदेश २ मा सरकार बनाउन सफल भयौ भने दुवै पार्टी एक भएर अघि बढेमा मधेशमा कुनै शक्ति हावी हुन नसक्ने दाबी गरिन् ।
उनले रेशम चौधरीलाई रिहाई नगरिए संघर्ष गर्ने चेतावनी दिदै राजनीतिक मुद्दा फिर्ता लिने पटक पटक सहमति भएको अवस्थामा रेशम चौधरीलाई जेल हाल्नु राज्य पक्षको संकिर्ण मानसिकताको उपज रहेको बताईन ।
उनले यदि रेशम चौधरीलाई राजनीतिक मुद्दामा जेल हालिन्छ भने विगतका अन्य अन्दोलनका एमाले माओवादीका नेताहरुलाई पनि जेल हाल्नुपर्ने भनिन् । उनले रेशम चौधरीमाथि अधिकारवादी आन्दोलनको क्रममा घटनालाई आधार जेल हाल्ने गलत रहेको भन्दै आफ्नो उनको रिहाईका आफ्नो पार्टीले संघर्ष गर्ने चेतावनी दिइन ।
साथै उपाध्यक्ष यादवले देश संघीयताको कार्यान्वयनको क्रममा रहेको अवस्थामा संघीय सरकार मधेश र मधेशीप्रति विभेदकारी मानसिकताबाट ग्रसित रहेको आरोप लगाउंदै भनिन् सामान्य विमान दुर्घटना, बस दुर्घटनामा राष्ट्रिय शोक घोषणा गर्ने तर दर्जनौ व्यक्तिको ज्यान जाने गरी बारा र पर्सा जिल्लामा आएको भिषण घटनामा राष्ट्रिय शोक घोषणा नगर्नु लज्जास्पद कुरा हो ।
कार्यक्रममा प्रदेश २ का आन्तरिक मामिला तथा कानूनमन्त्री ज्ञानेन्द्र यादवले संघीय सरकार जति क्रुर बनेपनि प्रदेश सरकारले आफ्नो संवैधानिक अधिकार लिएर नै छाड्ने चेतावनी दिए ।
उनले संघीय सरकारले कानून बनाउन देखि विकास निर्माण लगायतका हरेक काममा अवरोध गर्दै आएको कारण प्रदेश सरकारलाई काम गर्न कठिनाई भइरहेको भन्दै छिट्टै नै प्रदेश सरकारले आफ्नो कानूनहरु बनाएर कार्यहरु तिव्रगतिमा सुचारु गर्ने बताए ।
नगर अध्यक्ष विष्णुदेव साहको अध्यक्षतामा भएको सो उद्घाटन सत्रमा प्रदेश सभा सदस्य रामआशिष यादव, चमेली देवी दास, फोरम नेपालका केन्द्रिय सदस्य महाजन यादव, बेचन मुखिया लगायतका वक्ताहरुले आ आफ्ना धारणा राखेका थिए ।