जनकपुरधाम, वैशाख २ गते ।
शितलता प्रदानको उद्देश्यले प्रत्येक वर्ष झै यसवर्ष पनि मिथिलाञ्चलको लोकपर्व “जुडशितल” जनकपुरधाम सहित देशका विभिन्न स्थानमा निकै हर्षोल्लासका साथ मनाइएको छ ।
सोमवार एकाबिहानै बुवाआमा, गुरु, मान्यजन एवं आफूभन्दा जेठा व्यक्तिले आफूभन्दा सानालाई वर्षभरि शितलता प्रदानको उद्देश्यले टाउकोमा पानी छर्किदै आशिर्वाद दिएर जुडशितल मनाइएको छ ।
जुडशितलको प्रमुख आर्कषण होलीमा रंगअबीर खेलिए जस्तै हिलोपानीले खेलिने दृश्य लोप हुंदै गएपनि जनकपुरधाम स्थित केही संघ संस्थाहरुले कार्यक्रम आयोजना गरी त्यसलाई निरन्तरता दिदै आएको छ ।
सोही क्रममा जनकपुरको गंगासागरको डिलमा सेभ द हिस्टोरिकल र अरगजा पोखरीको डिलमा जानकी युवा क्लबको आयोजनामा एकअर्कालाई हिलो दलेर जुडशितल मनाएका छन् ।
सोमवार बिहान जनकपुरको गंगासागरको डिलमा स्थानीय बुद्धिजीवी, नागरिक समाजका अगूवा, कर्मचारी, प्रहरी निकायका पदाधिकारी तथा स्थानीय युवाहरुले एकअर्कालाई हिलो दलेर जुडशितल मनाएका छन् ।
त्यसैगरी लोप हुंदै गएको संस्कृतिको जर्गेना स्वरुप जानकी युवा क्लबका पदाधिकारी तथा स्थानीय युवाहरुले अरगजा पोखरीको डिलमा हिलोपानीमा रमाउंदै जुृडशितल मनाएका छन् ।
यसपर्वको महत्वबारे संस्कृतिविद् प्राध्यापक डा. भोगेन्द्र झाले जुडशितलमा हिलो र पानी जिउमा लगाउंदा स्वास्थ्य लाभ हुने र छालाका विभिन्न रोगहरुबाट मुक्ति हुने वैज्ञानिक कारण रहेको छ भने, यो पर्वमा पानी हालेर खेल्यो भने, गर्मी महिना भरी शितलता प्रदान हुने बताए ।
मानव सहित प्रकृतिमा रहेका जीवजन्तु र बोटविरुवालाई समेतलाई वैशाखको चर्को घामबाट राहत दिलाउन स्वरुप पानीले हाल्ने र विभिन्न रोगबाट मुक्तिका लागि माटो शरीरमा दल्ने भएको हुनाले जुडशितललाई प्रकृति पुजाको पर्वको मानिदै आएको सेभ हिस्टोरिकलका अध्यक्ष एवं प्रदेश सांसद रामआशिष यादव बताउंछन् ।
वर्षमा एकदिन जुडशितलका दिन चुल्होलाई विश्राम दिने मान्यता समेत रहेको छ । सोही मान्यता अनुरुप घरको कुल देवता र चुल्होलाई एकदिन पुर्व बनाइएको भात, दाल, बडीकढी, सोइजनको तरकारी र तरुवा लगायतका परिकार प्रसाद स्वरुप चढाइएको छ ।
तर पहिले पहिले यो पर्वमा बिहान उठेर सम्पुर्ण गाउंवासीहरु मिलेर एकत्रित भई एक अर्कामाथि हिलो, माटो, पानी र खरानी छ्यापेर खेलिने गरिएको थियो तर अब आधुनिकता हावि हुंदै जांदा यो पर्व लोपोन्मुख हुंदै गएको छ ।
यो विषयमा आफ्नो प्रतिक्रिया दिनुहोस् !