जनकपुरधाम, चैत २१ गते ।
प्रदेश २ का समाजिक विकास मन्त्री नवलकिशोर साहले सुर्तिजन्य पदार्थ र मदिरा सेवन नियन्त्रण गर्न छिट्टै नै नयाँ कानून ल्याउने प्रतिबद्धता जनाएको छ ।
बिहीवार जनकपुरधाममा स्वास्थ्य पत्रकार मंच र एक्सन नेपालद्वारा संयुक्त रुपमा आयोजित सुर्तिजन्य पदार्थ नियन्त्रणमा प्रदेश सरकार र स्थानीय सरकारको भूमिका विषयक वृहत अन्तरक्रिया कार्यक्रममा मन्त्री साहले सुर्तिजन्य पदार्थ सेवनले गर्दा प्रदेश २ मा त झन् भयावह रुप लिदैं गइरहेको कारण सुर्तिजन्य पदार्थ र मदिरा सेवनमा नियन्त्रण गर्न छिट्टै नयाँ कानून ल्याउने बताए ।
मन्त्री साहले सुर्तिजन्य पदार्थको नियन्त्रण र नियमन गर्न संघीय सरकारले २०६८ मै कानून ल्याएपनि केन्द्रिय तह र प्रहरी प्रशासनको कमीकमजोरीको कारण हालसम्म कार्यान्वयन हुन नसकेको गुनासो गर्दै ती कानून कार्यान्वयन गर्न गराउन संघीय, प्रदेश र स्थानीय तीनवटै तहका सरकारलाई इमान्दार हुनुपर्ने बताए ।
कार्यक्रममा प्रदेश सांसद रामचन्द्र मण्डलले कानून बनाएर केही हुदैन, केन्द्रिय तहबाटै सुर्तिजन्य पदार्थ र मदिरा उत्पादक कम्पनीको लाइसेंस खारिज गरी नयाँ लाइसेंस प्रतिबन्ध लगाए आफै नियन्त्रण हुने बताए । उनले थप्दै भने अन्य मुलुकबाट चोरी निकासी भएर आउने पानपराग, गुटखा, सिगार, हुक्का लगायतका सुर्तिजन्य पदार्थको नियन्त्रणका लागि सीमावर्ती भन्सार र सुरक्षामा खटिएका प्रहरी इमान्दार भई दिएर त्यो पनि बन्द हुनेछ ।
कार्यक्रममा वीर अस्पतालका क्यान्सर विशेषज्ञ चिकित्सक डा. विष्णु दत्त पौडेलले सुर्तिजन्य पदार्थ सेवनले गर्दा लाग्ने क्यान्सर, हार्ट अटैक लगायतका विभिन्न रोगबाट नेपालमा मात्रै वार्षिक २७ हजार १ सय ३७ जनाको मृत्यु हुने गरेको तथ्यांक सहित सुर्तिजन्य पदार्थ र मदिरा सेवनले हुने रोग र शारिरीक क्षतिबारे जानकारी गराएका थिए ।
कार्यक्रममा स्वास्थ्य तथा जनसंख्या मन्त्रालयका कानून उपसचिव पुष्करराज नेपालले सुर्तिजन्य पदार्थ नियन्त्रण गर्न नेपाल सरकारद्वारा गरिएका प्रयास र मौजूदा कानूनी व्यवस्था बारे जानकारी दिएका थिए ।
स्वास्थ्य पत्रकार मंच नेपालका अध्यक्ष कल्पना आचार्यको अध्यक्षतामा भएको सो कार्यक्रममा प्रदेश सांसद प्रमिला दास, चमेलीदेवी दास, जनकपुर उपमहानगरपालिकाका कार्यकारी अधिकृत सीता परियार, निमित प्रजिअ वेदप्रसाद आर्याल, जनकपुर अंचल अस्पतालका निमित मेसु डा. जामुन सिंह लगायतका व्यक्तिहरुको पनि आ आफ्ना धारणा राखेका थिए ।
यो विषयमा आफ्नो प्रतिक्रिया दिनुहोस् !