हुरीबतास पीडितको घर सरकारले बनाई दिने घोषणा

जनकपुरधाम, चैत १८ गते ।
बारा र पर्सामा हावाहुरीबाट घर भत्केका पीडित परिवारको घर संघीय सरकारले बनाई दिने घोषणा गरिएको छ ।
गृह मन्त्रालले बारा र पर्सामा हावाहुरीले क्षति र्पुयाएका सबै घरटहरा निर्माण गर्ने घोषणा गरेको छ । घटनास्थलको निरीक्षणका लागि सोमबार बारा पुगेका गृहसचिव प्रेम कुमार राईले उक्त घटना अत्यन्तै दुःखद भएको र त्यसले र्पुयाएका सबै घरटहरा सरकारले निर्माण गर्ने बताए ।
नेकपा संसदीय दलका नेतासमेत रहेका ओलीले राहत र उद्धारमा खटिन पार्टीका नेता कार्यकर्तासँग समेत आग्रह गरेका छन् । राईका अनुसार अहिले गृहमन्त्रालयले क्षतिको विवरण संकलन गरिरहेको र एकिन तथ्याङ्क आउनासाथ भत्किएका सबै घरटहरा गृहमन्त्रालयले निर्माणको कार्य अघि बढाउनेछ ।
यसैबीच सोमवार हुरीबतास प्रभावित क्षेत्रको निरिक्षण गर्दै प्रधानमन्त्री केपी शर्मा ओली र स्वास्थ्य तथा जनसंख्या मन्त्री उपेन्द्र यादवले संयुक्त रुपमा निरिक्षण गरेका छ्न ।
निरीक्षणका क्रममा प्रधानमन्त्री ओलीले राहत र उद्धारमा कुनै समस्या हुन नदिन निर्देशन समेत दिएको कुरा प्रमका प्रेस संयोजक चेतन अधिकारीले जानकारी दिएका छन् । प्रधानमन्त्रीले कलैयास्थित अस्पतालमा पुगेर घाइतेको अवस्थाबारे पनि जानकारी लिएका पनि छन् ।
प्रधानमन्त्री ओलीले प्रमुख जिल्ला अधिकारी राजेश पौडेलसंग घटना बारे जानकारी समेत लिएका छन् । गएराति साँझ पौने ८ बजेदेखि सवा ८ बजेसम्म गएको हावाहुरीले अहिलेसम्म दुई दर्जनभन्दा बढीको मृत्यु भइसकेको र सयौं घाइते भएको जानकारी दिएका थिए ।
हावाहुरीले कलैया उपमहानगरपालिकासहित महागढीमाई र पचरौता नगरपालिका तथा प्रसौनी, फेटा, सुवर्ण र परवानीपुर गाउँपालिकामा धनजनको क्षति भएको छ ।