जनकपुरधाम, पुस २७ गते । जनता समाजवादी पार्टी (जसपा) नेपाल र लाेकतान्त्रिक समाजवादी पार्टी (लाेसपा) बीच पार्टी एकीकरण प्रक्रिया टुगिंएकाे छ।
राजनीतिक दल सम्बन्धी ऐन, २०७३ तथा प्रचलित कानुन अनुसार पार्टीको केन्द्रीय समन्वय समितिका निर्णयहरू पार्टीका संरक्षक तथा अध्यक्षबाट प्रमाणिकरण सहित एकीकृत ४३ सदस्यीय समिति समेत गरिएको जनाइएको छ।
समितिको संरक्षकमा महन्थ ठाकुर र अध्यक्षमा उपेन्द्र यादव रहने व्यवस्था गरिएको छ।
समितिका सदस्यहरूमा अर्जुन थापा, अशोक यादव, उमाकान्त झा, चन्द्रेश्वर पासवान, जितेन्द्र प्रसाद सोनार, उमेश यादव, तारा विश्वकर्मा, दीपक कार्की, निर्जला राउत, प्रकाश अधिकारी, परमेश्वर साह, बलवीर नेपाली, बृजेशकुमार लाल, डा. विजय कुमार सिंह, विनोद कुमार सिंह, मुनेन्द्र कुमार सिंह यादव, मनीष कुमार मिश्र, मुकेश कुमार झा, मो. खालिद सिद्दिकी, रेणु कुमारी यादव, रमेश प्रसाद कुर्मी, राजकुमार राई, रामकुमार शर्मा र रुक्म चन्दजड रहेका छन् ।
विवादित रहेका २०८२ फागुन २१ गते हुने प्रतिनिधि सभाको उम्मेदवारका लागि पेश गरिने मनोनयन पत्रमा केन्द्रीय समन्वय समितिको निर्णयअनुसार महन्थ ठाकुर र उपेन्द्र यादवले संयुक्त रूपमा हस्ताक्षर गर्ने सहमति भएको छ।
दुवै दलबीच भएको एकीकरण सम्बन्धी सम्झौता पत्र र त्यसअनुसार गरिएका निर्णयलाई कार्यान्वयनमा लैजान केन्द्रीय समन्वय समिति गठन पत्रमा जसपा नेपालबाट अध्यक्ष उपेन्द्र यादव र लाेसपाबाट अध्यक्ष महन्थ ठाकुरले हस्ताक्षर गरेकाे छ ।
सम्झौता अनुसार पार्टीको चुनाव चिह्न छाता नै रहनेछ। पार्टीको झण्डा माथि रातो, बीचमा सेतो र तल हरियो रंगको रहनेछ भने सेतो भागको बीचमा छाता अंकित रहने व्यवस्था गरिएको छ।
केन्द्रीय समन्वय समितिले आवश्यकतानुसार ११ सदस्यीय सचिवालय समेत गठन गर्नेछ भने दुवै पार्टीका केन्द्रीय समिति तथा मातहतका सबै तहका संगठन, भ्रातृ तथा शुभेच्छुक संगठनहरू केन्द्रीय समन्वय समितिको निर्देशनअनुसार जनता समाजवादी पार्टी, नेपालको मातहतमा रही सञ्चालन हुने सम्झौतामा उल्लेख छ।
पार्टी संगठन तथा पार्टीगत आबद्ध संस्थाहरूबीच समायोजन नभएसम्म आ–आफ्नो स्थान र कार्यक्षेत्रमा पार्टीको मातहत रही क्रियाशील रहने व्यवस्था गरिएको छ।
यो विषयमा आफ्नो प्रतिक्रिया दिनुहोस् !