जनकपुरधाम, असोज ९ गते । नेपाली कांग्रेसका महामन्त्री विश्वप्रकाश शर्माले जेन—जी आन्दोलनको क्रममा आन्दोलनकारीहरुद्वारा तोडफोड र आगजनी गरी क्षति पुरयाइएको संरचनाको पार्टी कार्यालय तथा नेताहरुको घरको अवलोकन गरेका छन् ।
बिहीवार जनकपुरधाम आएका महामन्त्री शर्माले आन्दोलनकारीहरुद्वारा क्षतिग्रस्त बनाइएका पार्टीका प्रदेश र जिल्ला कार्यालय तथा पार्टीका सह महामन्त्री महेन्द्र यादव र पार्टीका नेता समेत रहेका प्रदेश सरकारका निवर्तमान ऊर्जा, सिचाई तथा खानेपानी मन्त्री शेषनारायण यादवको घरको अवलोकन गरेका हुन ।
अवलोकनको क्रममा उनीसँगै पार्टीका सहमहामन्त्री महेन्द्र यादव, प्रदेश अध्यक्ष कृष्णा यादव, जिल्ला अध्यक्ष योगेन्द्र पजियार लगायत कांग्रेसका नेता तथा कार्यकर्ताहरुको सहभागिता रहेको थियो । आन्दोलनकारीहरुले प्रदेश पार्टी कार्यालय, जिल्ला पार्टी कार्यालय, सह महामन्त्री महेन्द्र यादव र नेता शेषनारायण यादवको तोडफोड र आगजानीका साथै लुटपाट समेत गरेका छन् ।
आगलागीबाट नेता शेषनारायण यादवको घर जलेर पूर्णरुपमा नष्ट भएको छ, भने कम्प्यूटर, प्रिन्टर र घरमा भएका गरगहना तथा नगद समेत आन्दोलनमा रहेका गलत तत्वहरुले लुटेर लगेका छन् । उनी मन्त्रीको रुपमा मधेश भवन भित्र रहेका आवास समेत आन्दोलनकारीहरुले तोडफोड र आगजानी गरेका थिए । कार्यालयमा रहेका सम्पूर्ण गाडी जलाएर पूर्ण रुपमा नष्ट पारिएको छ ।
अवलोकन गर्दै महामन्त्री शर्माले भने नेपाली कांग्रेसका पार्टी कार्यालय र नेताहरुलाई छानी छानी निशाना बनाएर आक्रमण आन्दोलनकारीहरुले नगरी आन्दोलनमा घुसपैठ भएकाहरुले गरेका हुन ।
यो विषयमा आफ्नो प्रतिक्रिया दिनुहोस् !