जनकपुरधाम, भदौ १ गते । माध्यमिक शिक्षा परीक्षा (एसईई) को नतिजा सोमवार दिउंसो सार्वजनिक गरिएको छ ।
राष्ट्रिय परीक्षा बोर्डको सोमबार बसेको बैठकले एसईई परीक्षा नतिजा सार्वजनिक गर्ने निर्णय गरिएको कुरा बोर्डका अध्यक्ष प्रा.डा. चन्द्रमणि पौडेलले जानकारी दिएका छन । पौडेलका अनुसार ४ लाख ७२ हजार ७८ विद्यार्थीको परीक्षाफल प्रकाशित भएको हो ।
नतिजा टेलिफोन, एसएमएस र बेभसाइटमा हेर्न सकिन बोर्डले जनाएको छ । गत ६ चैतका लागि निर्धारित एसईई कोभिड भाइरस संक्रमणको जोखिमलाई दृष्टिगत गर्दै अन्तिम समयमा स्थगित भएको थियो ।
यी हुन नतिजा प्रकाशनको आधार
परीक्षा नहुने भएपछि विद्यालयले गरेको आन्तरिक मूल्यांकनलाई नै आधारमानी नतिजा सार्वजनिक गर्ने निर्णय गरिएको हो । बोर्डका निर्देशनानुसार विद्यालयहरूले विद्यार्थीको मूल्यांकन गरेर जिल्ला समन्वय ईकाई मार्फत बोर्डमा असार २० गतेसम्म पठाएका थिए ।
सम्बन्धित विद्यालयका प्रधानाध्यापकको अध्यक्षताको ३ गठित सदस्यीय मूल्यांकन समितिले बोर्ड बनाएको मापदण्ड अनुसार आन्तरिक मूल्यांकनका आधारमा कक्षा १० का विद्यार्थीको नतिजा तयार गरेको हो । सो मूल्यांकनलाई राष्ट्रिय परीक्षा बोर्डले पछि प्रमाणित गर्नेछ ।
कक्षा १० मा देशभर ४ लाख ८२ हजार ७ सय ७ जना विद्यार्थी परीक्षामा सहभागी थिए । बोर्डका अनुसार यो नतिजा कक्षा ११ पढ्नका लागि निकालिएको हो । मूल्यांकनमा विद्यार्थीको विवरण झुठा ठहरेमा वा गलत विवरण पेस गरेको पाइए मूल्यांकन समिति नै जवाफदेही हुने गरी कार्यविधि बनाईएको थियो ।
माध्यमिक शिक्षा पाठ्यक्रम, २०७१ अनुसार विद्यालयहरुले लिएका पछिल्लो पटकको परीक्षाको अंकलाई विषयगत पूर्णाङ्क अन्तरगत परिवर्तन गरी विषयगत अन्तिम मूल्यांकनको प्राप्तांक कार्यविधि अनुसार दिइएको हो ।
नतिजा प्रकाशन पश्चात पुनर्योग गराउने, उत्तरपुस्तिका हेर्ने, पुनः परीक्षण गराउने र पुरक ग्रेडवृद्धि परीक्षा यस वर्ष सञ्चालन नहुने कार्यविधिमा भनिएको छ ।
यो विषयमा आफ्नो प्रतिक्रिया दिनुहोस् !