लोक समाचारदाता
जनकपुरधाम, पुस २७ गते ।
महिला शहिद पत्रकार उमा सिंहको आइतवार जनकपुरधाममा ११ औं श्रद्धाञ्जली सभा सम्पन्न गरिएको छ ।
नेपाल पत्रकार महासंघ धनुषाले आइतवार एक कार्यक्रमका बिच देशकै पहिलो शहीद पत्रकार सिंहको प्रतिमामा पुष्प अर्पण तथा मौन धारणा सहित ११ औँ स्मृति दिवस मनाएका हुन ।
जनकपुरधाममा पछिल्लो पटक उपमहानगरपालिकाका मेयर लालकिशोर साहले समाचार संकलनमा गएका पत्रकारहरुलाई गरेको दुव्र्यवहार र कुटपिट घटनाको सन्दर्भ जोडदै कार्यक्रमलाई सम्बोधन गर्ने पत्रकारहरुले पत्रकारिता पेशा अहिलेपनि संक्रमणकालिन अवस्था नै रहेकोले प्रेस स्वतन्त्रता हनन विरुद्ध संगठित भएर अघि बढनुपर्नेमा जोड दिए ।
साथै प्रेस स्वतन्त्रतामाथि हनन गर्न वर्तमान नेपाल र प्रदेश समेत लागि परेको कुरा पछिल्लो पटक सूचना तथा संचार सम्बन्धी विभिन्न विधेयकले देखाइसकेकोले अबको आगामी कदम हाम्रो भ्रष्टाचार र अपराध विरुद्ध मात्र नभई आफ्नो पेशालाई सुरिक्षत गर्नतर्फ लाग्नुपर्छ भने ।
सो कार्यक्रममा नेपाल पत्रकार महासंघ धनुषाका पुर्वअध्यक्षहरु रामआशिष यादव, उमेश साह, माधव आचार्य, पुर्व केन्द्रिय सदस्य अजय अनुरागी लगायतका पत्रकारहरुले आ आफ्ना धारणा राखेका थिए ।
के थियो घटना
स्थानीय रेडियो टुडेमा कार्यरत उपमहानगरपालिका वडा नं. १४ स्थित गोविन्द कार्कीको घरमा डेरा लिएर बस्दै आएका उमा सिंहलाई २०६५ पुस २७ गते राती करिब साढे ७ बजेको समयमा समाचार लेखिएको भरमा एक समूहले आक्रमण गरी विभत्स हत्या गरेको थियो । प्रहरीले हत्या आरोपमा उनका भाउजु सहित दुईजना अहिले जन्मकैद सहितको सजाय भोगी रहेका छन ।
उमा सिंह हत्याको अभियोगमा उमाकी भाउजू ललिता सिंह, ललिताको छोरा अभिषेक सिंह, सिरहा रामपुरको श्रवण कुमार यादव, धनुषा लक्कडका नेमलाल पासमान, बल्हासघाराका स्वामीजी भनिने उमेश यादव, सिरहा महेशपुरका चन्देश्वर साह, सिरहा सिमराका धनेश्वर साह, सिरहा सितापुरका विजय यादव, विन्दु यादव, भारत सीतामढीको नरहा कटरहियाका वैद्यनाथ सिंह कुमर र उनको छोराहरू धनञ्जय सिंह र अजय सिंह, राजपुरका सुभाष यादव भन्ने सुमेश्वर यादव, महोत्तरी खुट्टा पिपराढीका विमलेश झा भनिने विमलेश विमलविरुद्ध धनुषा जिल्ला अदालतमा अभियोग पत्र दायर गरेको थियो ।
२०६८ जेष्ठ २६ मा धनुषा जिल्ला अदालतका न्यायाधीश विमलप्रसाद ढुङ्गेलले उमा सिंहकी भाउजू ललिता सिंहलाई जन्म कैद र नेमलाल पासमानलाई सर्वस्वसहित जन्म कैद सजायको फैसला गरेको थियो । ती दुवै जना अहिले जलेश्वर कारागारमा छन् ।
त्यसैगरी न्यायाधीश ढुङ्गेलको इजलासले प्रतिवादी भनिएका श्रवण कुमार यादवलाई सफाई दिई जलेश्वर कारागारबाट थुना मुक्त गरिदिनु भनी फैसला गरेका थिए ।
यो विषयमा आफ्नो प्रतिक्रिया दिनुहोस् !