लोक समाचारदाता
जनकपुरधाम, पुस २० गते ।
गुठी संस्थान जनकपुरधामका तात्कालिन प्रमुख राजबाबु पाण्डे र निमित प्रमुख मनोज शर्मालाई भ्रष्टाचारी ठहर गर्दै अख्तियार दुरुपयोग अनुसन्धान आयोगले विशेष अदालतमा आरोप मुद्दा दायर गरेको छ ।
आइतवार दायर गरिएको आरोप पत्रमा धनुषा जिल्लाको तात्कालिन भरतपुर गाविसमा नेपाली सेनाको लागि अधिग्रहण भएको गुठीको स्वामित्व रहेको जग्गामा गुठी संस्थान जनकपुरका तात्कालिन प्रमुख राजबाबु पाण्डेले किर्ते मोही कायम गरी मुआब्जा वितरण वापत १९ लाख ३० हजार रुपैया घुस लिएको ठहर गरिएको छ ।
सो मुआब्जा वितरणमा भ्रष्टाचार भएको भनी कारबाहीका लागि परेको उजुरीको अनुसन्धानको क्रममा प्रमुख पाण्डेले कायम गरिएको किर्ते मोहीहरुलाई मुआब्जा रकम भुक्तानी गरे वापत बिचौलिया मार्फत उक्त रकम घुस लिएको पुष्टि गर्दै भ्रष्टाचार निवारण ऐन, २०५९ को दफा ३ को उपदफा (१) को कसुर भएकोले निज विरुद्ध उक्त रकम बराबरको बिगो सहित असुल गर्न मांग आरोप पत्रमा गरिएको छ ।
यसका साथै सोही ऐनको दफा ३ को उपदफा (१) को खण्ड (च) बमोजिम सजायको मांग समेत अख्तियारले गरेको छ ।
त्यसैगरी गुठी संस्थान शाखा कार्यालय जनकपुरका तत्कालीन निमित प्रमुख मनोज शर्मा भनिने मनोजकुमार आचार्यले मोहीलाई मुआब्जा वितरणमा ६ लाख ५० हजार रुपैया विचौलिया मार्फत घुस लिएको स प्रमाण पुष्टि गर्दै उनी विरुद्ध पनि अदालतमा आरोपपत्र दायर गरिएको छ ।
अख्तियारका प्रवक्ता प्रदीपकुमार कोइरालाद्वारा जारी विज्ञप्तिमा भ्रष्टाचार निवारण ऐन, २०५९ को दफा ३ को उपदफा (१) को कसुर भएकोले निज शर्मा विरुद्ध बिगो रु.६ लाख ५० हजार कायम गरी भ्रष्टाचार निवारण ऐन, २०५९ को दफा ३ को उपदफा (१) र सोही ऐनको दफा ३ को उपदफा (१) को खण्ड (ङ) बमोजिम सजाय हुन र उक्त बिगो रकम सोही ऐनको दफा ३ को उपदफा (१) बमोजिम असुल गरी जफत हुन मागदाबी गरिएको जनाइएको छ ।
त्यस्तै गुठी संस्थान जनकपुरका तत्कालिन वरिष्ठ लेखा सहायक हरिचन्द्र भुसालले मोही भनिएका व्यक्तिबाट रु. ४ लाख ३० हजार घुस लिएको तथ्य प्रमाण सहित ठहर गर्दै असुल उपर र सजायको मांग गर्दै उनी विरुद्ध पनि अख्तियारले आरोप पत्र गरेको छ ।
यसका साथै बिचौलिया भनिएका सुमनकान्त ठाकुर, मोही भनिएका गायत्री देवी जयसवाल र उनका छोरा शत्रुध्न जयसवाल सँग पनि लाखौ रुपैया बिगो सहित असुल उपर गर्न मांग गरिएको छ ।
पाण्डेजस्तै जानकी मन्दिर, राम मन्दिर र बेला गुठीको गुठीको सयौं बिगाहा जग्गा हिनामिना गर्ने पूर्व सहायक प्रशासक दीपकबहादुर पाडेका बिरुद्ध पनि अख्तियारले छानबिन गरिरहेको छ । उनले पोखरा, भक्तपुरदेखि विभिन्न ठाउँका जग्गा हिनामिना गरेका थिए । उनी गतबर्ष पुसमा अवकाश भएका हुन् ।
यो विषयमा आफ्नो प्रतिक्रिया दिनुहोस् !