जनकपुरधाम, वैशाख ५ गते । नेपाल अडिटर्स एशोसिएशन (अडान) मधेश प्रदेशको नयाँ कार्यसमिति पुनः शोभाकान्त झाकै अध्यक्षतामा गठन गरिएको छ ।
शुक्रवार सम्पन्न सातौं अधिवेशनबाट झालाई प्रदेश अध्यक्षमा चयन गर्दै ११ सदस्यीय कार्यसमिति गठन गरिएको छ । नवगठित कार्यसमितिमा प्रदेशका सात जिल्लाका प्रतिनिधिहरुलाई राखिएको छ ।
उपाध्यक्षमा सप्तरीका सुदाम्बर यादव र पर्साका हृदयमोहन लाल दास, सचिवमा बाराका शिवेन्द्र गिरी, सह–सचिवमा धनुषाका भुवनेश्वर यादव र कोषाध्यक्षमा धनुषाका नन्दकुमार झा चयन भएका छन् ।
त्यस्तै, सदस्यहरूमा सर्लाहीका योगेन्द्र यादव, महोत्तरीका उपेन्द्र राय र राम वैदेही मिक्ष, सिरहाका उमेश लाल दास र धनुषाका भरत यादव रहेका छन् । जनकपुरधाममा सम्पन्न सातौं अधिवेशनमा मधेश प्रदेशभरिका लेखापरीक्षक (अडिटर)हरूको उल्लेखनीय उपस्थिति रहेको थियो ।
यसअघि उद्घाटन सत्रका प्रमुख अतिथि अडानका केन्द्रिय अध्यक्ष केदारनाथ पौडेलले अडिटरहरू राष्ट्रका आर्थिक प्रहरी भएको उल्लेख गर्दै पेशागत इमानदारी, पारदर्शिता र निष्पक्षता नै अडिट पेशाको मूल आत्मा भएको बताएका थिए ।
उनले भने, ‘अहिलेको चुनौतीपूर्ण समयमा अडिटरहरूले आफ्नो भूमिकालाई अझ जिम्मेवार र उत्तरदायी बनाउँदै समाजमा विश्वास बढाउने काम गर्नुपर्छ ।’ उनले नियामक संस्था आइक्यानसँग समन्वय गर्दै संस्थागत सुधारका लागि निरन्तर पहल गरिरहेको जानकारी पनि दिए ।
विशिष्ट अतिथि तथा आइक्यानका अध्यक्ष प्रविण कुमार झाले अडिट पेशाको साख जोगाउन प्रत्येक अडिटरले आचारसंहिताको पालना गर्नुपर्नेमा जोड दिए । उनले भने, ‘हामीले गर्ने हरेक काम जनताको विश्वास र संस्थागत अनुशासनसँग जोडिएको हुन्छ । सानो गल्तीले पनि पेशाको छवि धूमिल हुन सक्छ ।’
अर्का विशिष्ट अतिथि तथा अडानका वरिष्ठ उपाध्यक्ष बद्री भट्टराईले आगामी दिनमा अडिट पेशा अझ चुनौतीपूर्ण हुने भन्दै प्रविधिसँग समायोजनको आवश्यकता औंल्याए ।
कार्यक्रमका अध्यक्ष तथा अडान मधेश प्रदेश अध्यक्ष शोभाकान्त झाले प्रदेश अधिवेशन अडिटरहरूको पेशागत क्षमता अभिवृद्धि, संगठनात्मक एकता र नीतिगत बहसको थलो भएको बताए ।
उनले भने, ‘अडान मधेश प्रदेशले संस्थागत विकास, सदस्य विस्तार, तालिम सञ्चालन र नीति संवादलाई प्राथमिकता दिएको छ । आगामी कार्यकालमा यी एजेन्डालाई अझ प्रभावकारी रूपमा अघि बढाइनेछ ।’
अधिवेशनमा सूर्य अधिकारी, प्रदीप यादव, बहादुर सिंह विष्ट, हरि कार्की, राजन ढुंगाना, राम गोपाल महर्जन, बलाराम चौधरी, मेघराज पौडेल, उमेश मिश्र, सूर्य नारायण झा, राजकुमार झा, सन्तोष साह, दिनानाथ रौनियार र उग्रकान्त झा लगायत विभिन्न तहका पदाधिकारीहरूको सहभागिता रहेको थियो ।
यो विषयमा आफ्नो प्रतिक्रिया दिनुहोस् !