विराटनगर । मोरङको लेटाङ नगरपालिका–८ स्थित ज्यामिरे टोलकी १२ वर्षीया करुणा राईको बलात्कारपछि हत्याको आशंकामा प्रहरीले दुई जनालाई नियन्त्रणमा लिएको छ ।
लेटाङकै ६४ वर्षीय र ४६ वर्षीय पुरुषलाई नियन्त्रणमा लिएर अनुसन्धान थालिएको मोरङ प्रहरी प्रवक्ता डीएसपी मञ्जील मुकारुङले जानकारी दिएपनि पक्राउ परेकाहरुको नाम भने खुलाएको छैन । उनका अनुसार पक्राउ परेकाहरूको घर बालिकाको घर आउने बाटोमा रहेको छ ।
बुधवारदेखि हराएकी ती बालिकाको शव खाल्डोभित्र वस्त्रविहीन अवस्थामा शुक्रवार भेटिएको थियो । विद्यालयबाट घर फर्किने क्रममा बुधवार दिउँसोदेखि बालिका बेपत्ता भएकी थिइन् ।
शव पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको मोरङ प्रहरीले जनाएको छ । बालिकाको बलात्कारपछि हत्या भएको हो कि भन्ने आशंका प्रहरीले गरेको छ । पोष्टमार्टम रिपोर्ट आएपछि मात्रै थप भन्न सकिने मुकारुङले बताए ।
जाँते माध्यमिक विद्यालयको कक्षा ६ मा अध्ययनरत बालिका विद्यालयबाट घर फर्किने क्रममा बुधवार दिउँसो ४ बजेदेखि बेपत्ता भएकी थिइन् । बालिका बेपत्ता भएपछि खोजतलासका लागि परिवारका सदस्यले प्रहरीलाई सूचना दिएका थिए ।
घटनास्थल बालिकाको घरबाट लगभग ३ किलोमिटर जति दक्षिण र उनी अध्ययनरत विद्यालयबाट लगभग २ किलोमिटर पश्चिममा पर्छ । प्रहरीले खाल्डोबाट बालिकाको शव उत्खनन गरेर बाहिर निकाल्दा घटनास्थल तनावपूर्ण बनेको थियो । ठूलो संख्यामा भेला भएका विद्यार्थी र स्थानीयले आक्रोशित हुँदै प्रहरीविरुद्ध नाराबाजी गरेका थिए ।
यो विषयमा आफ्नो प्रतिक्रिया दिनुहोस् !