विराटनगर । प्रदेश १ का मुख्यमन्त्री राजेन्द्रकुमार राईले मंगलवार विश्वासको मत लिने निश्चित भएको छ ।
गएको कात्तिक १६ गते सपथ ग्रहण गरेका मुख्यमन्त्री राईले कात्तिक ३० गते मंगलबार प्रदेशसभाबाट विश्वासको मत लिने निश्चित भएको जनाइएको छ ।
आइतबार प्रदेश सरकारको तर्फबाट उनले प्रदेशसभाका सचिव गोपाल प्रसाद पराजुली समक्ष विश्वासको मत लिने सम्बन्धि सूचना दर्ता दर्ता गरेका छन । मुख्यमन्त्री राईका प्रमुख स्वकीय सचिव संदीप राईले आफु प्रदेश सभामा सरकारले विश्वासको मत लिने सम्बन्धि सूचना दर्ता गरेको बताए ।
सूचना दर्ता भएसँगै मुख्यमन्त्री राईले मंगलबारको प्रदेशसभा बैठकमा संविधानको धारा १८८ को उपधारा (२) तथा प्रदेशसभा नियमावली २०७४ को नियम १२८ को उपनियम (४) बमोजिम विश्वासको मतका लागि प्रस्ताव पेश गर्नेछ ।
सभामुख प्रदीपकुमार भण्डारीले कात्तिक २३ गतेका लागि प्रदेशसभाको पाँचौ बैठक बोलाएका थिए । तर मुख्यमन्त्री राईले तयारी अपुग भएको भन्दै बैठक सार्न आग्रह गरेका थिए । सोही आग्रह अनुसार कात्तिक ३० गते दिउँसो १२ः३० बजेका लागि बैठक बोलाइएको छ ।
प्रदेशसभा नियमावलीको नियम १२८ को उपनियम १ मा संविधानको धारा १६८ को उपधारा (२) वा (३) र धारा १८८ को उपधारा (१) वा (२) बमोजिम मुख्यमन्त्रीले तीस दिनभित्र प्रदेश सभाबाट विश्वासको मत प्राप्त गर्न प्रस्ताव पेश गर्ने व्यवस्था छ ।
सभामुख भण्डारीले नियमावलीको नियम १२८ को उपनियम (४) अनुसार प्रस्ताव पेश गर्न अनुमति दिएपछि आफ्नो वक्तव्यसहित विश्वासको मतका लागि बैठकमा प्रस्ताव पेश गर्नेछन् ।
मुख्यमन्त्री राईसहित नेकपा एमालेका १० सांसद नेकपा (एकीकृत समाजवादी) मा गएपछि तत्कालिन मुख्यमन्त्री भीम आचार्य अल्पमतमा परेका थिए । आचार्यले प्रदेशसभामा विश्वासको लिन असफल भएपछि पाँच दलीय विपक्षी गठबन्धनको नेतृत्व गर्दै राई प्रदेश १ को तेस्रो मुख्यमन्त्री बनेका थिए ।
यो विषयमा आफ्नो प्रतिक्रिया दिनुहोस् !