विराटनगर, असोज ७ गते । बली चढाउन उद्देश्यले किशोरीलाई सुनसरीबाट भारततिर बेच्न लगिएको आरोपमा तीनजना पक्राउ परेका छन ।
प्रहरीले किशोरीलाई बेच्न लगिएको आरोपमा मोरङको लेटाङ नगरपालिका–३ घर भई रामधुनी नगरपालिका– ५ झुम्कामा तरकारी पसल सञ्चालन गर्ने २२ वर्षीया मनिका ढकाल, सप्तरी विष्णुपुर गाउँपालिका ५ घर भएका सुमितकुमार मण्डल र सप्तरीकै तिलाठी कोइलाडी गाउँपालिका १ घर भई विराटनगर बस्दै आएका २० वर्षीय प्रदीपकुमार मण्डललाई प्रहरीले पक्राउ गरेको हो ।
रामधुनी नगरपालिका ५ कि १७ वर्षीय किशोरीलाई सोमबार विहान विराटनगर हुँदै तीनजनाको समूहले भारत लगेको थियो । भारतको फारबिसगञ्ज क्षेत्रमा पुगेर नेपाल फर्किदै गर्दा विराटनगर महानगरपालिका– १७ इस्लामपुरबाट किशोरीको उद्धार गरी तिनीहरुलाई पक्राउ गरिएको मोरंग प्रहरीले जनाएको छ ।
सोमबार साँझ करिब ६ बजे साना हातहरु नामक संस्थाको सहयोगमा प्रहरीले ती किशोरीलाई उद्धार गरेका हुन । किशोरीको घर नजिकै बस्ने मनिकाले विराटनगरमा एउटा पूजामा कन्या पूजामा सहभागी हुने भनी सोमबार विहानै फकाएर घरबट ल्याएकी थिइन । कन्या पूजावापत ५ हजार रुपैयाँ दिने र आफूले एउटा मोवाइल किन्ने प्रलोभन मनिकाले ती किशोरीलाई दिएर ल्याएकी थिइन् ।
विराटनगर बसपार्क उत्रिएपछि उनलाई सुमित र प्रदीपसमेत मिलेर भारततर्फ लगेका थिए । प्रहरीका अनुसार मनिका फेसबुक मार्फत सुमितसँग नजिकिएकी थिइन् । पछिल्लो केही दिनयता मनिकालाई सुमितले पाँच फिट २ इञ्च की विवाह नभएकी र महिनाबारी नभएको युवती ल्याइदिए ४÷५ लाख रुपैयाँ दिने आश्वासन दिएका थिए ।
सुमितले नातामा भिनाजु पर्ने व्यक्तिका लागि प्रदीप र मनिकाको सहयोगमा विवाह नभएकी किशोरी लग्दै थिए । किशोरीलाई भारत पु¥याएको समूहले त्यहाँको सम्पर्क व्यक्ति भेट्न नसकेपछि अलमलियो । त्यतिबेला किशोरीले आफू समस्यामा पर्न लागेको थाहा पाएपछि रुँदै नेपालतर्फ फर्कि रहेको बेला साना हातको सम्पर्कको किशोरी आएकी थिइन ।
भारतीय सीमावर्ती क्षेत्र मोरङको इस्लामपुरमा साना हातहरु नामक संस्थाले सोधीखोजी गर्दा घटना शंकास्पद देखिएपछि प्रहरीलाई खबर गरेको थियो । प्रहरी स्रोतका अनुसार सुमितका भिनाजु भारतको सुपौल जिल्लामा बस्छन् । उनले सुमितलाई पूजाका लागि किशोरी ल्याइदिए १२ लाख रुपैयाँ दिने आश्वासन दिएका थिए ।
उद्दारमा खटिएको साना हातहरुका विराटनगर प्रमुख विवश श्रेष्ठले बालिकालाई बली चढाउनका लागि लगिएको देखिएको बताए । तर जिल्ला प्रहरी कार्यालय मोरङका प्रहरी उपरीक्षक सन्तोष खड्काले बेचबिखनका उद्देश्यले किशोरीलाई भारततर्फ लगेको हुनसक्ने बताएका छन ।
प्रहरीले नियन्त्रणमा रहेका तीनै जना विरुद्ध जिल्ला अदालतबाट म्याद थप गरी मानव बेचविखन मुद्धामा करवाही प्रक्रिया अघि बढाएको छ ।
यो विषयमा आफ्नो प्रतिक्रिया दिनुहोस् !