जनकपुरधाम, चैत १४ गते । प्रदेश २ सरकारले कृषि क्षेत्र पनि अत्यावश्यक सेवामा रहेकोले खाद्यान्न सहित कृषिजन्य सामाग्रीको आवश्यक व्यवस्था सुनिश्चित गर्न आग्रह गरेको छ ।
प्रदेश २ का भूमि व्यवस्था, कृषि तथा सहकारी मन्त्रालयले शुक्रवार एक प्रेस विज्ञिप्ति जारी गरी खाद्यान्न सामाग्री सहित कृषिजन्य पदार्थ र पशुपक्षीको दाना आहार ढुवानी एवं विक्री वितरणलाई अत्यावश्यक सेवाको रुपमा कायम गरी आवश्यक व्यवस्था सुनिश्चित गर्न आग्रह गरेको हो ।
विज्ञप्तिमा भनिएको छ जनजीविकाका लागि अत्यन्त आवश्यक पर्ने खाद्यवस्तुको उत्पादन, व्यवस्थापन तथा आपूर्ति सुचारु गर्ने प्रदेश सरकारसँगै नेपाल सरकार समेतको निर्णय रहेकोमा अत्यावश्यक खाद्यय वस्तुहरूको उत्पादन, ढुवानी र बिक्री वितरणलाई व्यवस्थित गर्न सम्बद्ध सबै पक्ष एवम् निकायहरूलाई मन्त्रालयको अनुरोध छ ।
लकडाउनको मूल उद्देश्य व्यक्ति–व्यक्तिबीच दूरी कायम गर्ने र कोरोना भाइरस संक्रमणको चेन चुँडाउने हुँदा सामाजिक दूरी कायम गर्दै र जैविक सुरक्षाका उपाय अवलम्बन गरी कृषितर्फ खाद्यान्न तथा बालीका बिउ, बेर्ना र सेट, पशुपक्षी तथा मत्स्य बीज लगायतका कृषिजन्य पदार्थ पनि अत्यावश्यक सेवा रहेको विज्ञप्तिमा उल्लेख छ ।
यी बाहेक हाँस–कुखुराका चल्ला, मौरीका घार तथा दैनिक उपभोग्य खाद्यान्न तथा नाशवान तरकारी, दुध, फलफुल, माछामासु, अण्डा तथा पशुपक्षीका दाना र आहाराका ढुवानी एवम् बिक्री वितरण तथा पशुपछी उपचार सेवालाई अत्यावश्यक सेवाका रूपमा कायम गरी सो सम्बन्धी आवश्यक व्यवस्था सुनिश्चित गर्न आग्रह गरेको छ ।
यो विषयमा आफ्नो प्रतिक्रिया दिनुहोस् !