लोक समाचारदाता
इटहरी, फागुन २० गते ।
किर्ते औठाछाप लगाई मृत्यु भएका व्यक्तिको जग्गा अर्कोको नाममा दर्ता गरेको आरोपमा सुनसरी मालपोत कार्यालयका तात्कालिन अधिकृत दधिराम गुरागाई र कर्मचारी सहित ८ जना कर्मचारी विरुद्ध मुद्दा दायर गरिएको छ ।
अख्तियार दुरुपयोग अनुसन्धान आयोगले धरान १० की रनमाया लिम्बुको किर्ते औठाछाप हक नपुग्ने रत्नदेवी लिम्बुलाई जग्गा हस्तान्तरण गरेको आरोपमा भ्रष्टाचार ठहर गरी जरिवाना र सजायको मांग दाबी सहित तिनीहरु विरुद्ध विशेष अदालतमा मुद्दा दायर गरेको हो ।
भूमिसुधार तथा मालपोत कार्यालय सुनसरीका तत्कालीन अधिकृत गुरागाई, नायव सुब्बा (तहरिर) मनोज घिमिरे, खरिदार (फाँटवाला) कृष्ण प्रसाद नेपाल र खरिदार (मोठफाँट) राम प्रसाद भट्टराई र ईटहरी उपमहानगरपालिका सुनसरीका शाखा अधिकृत राजेन्द्र धिमाल विरुद्ध मुद्दा दायर गरिएको अख्तियारले जनाएको छ ।
त्यसैगरी लेखापढी व्यवसायी पुस्कर प्रसाद पोखरेल, गैरकानूनी तरिकाले जग्गा हतियाउने रत्नदेवी लिम्बु र साक्षी गोविन्द कोइरला विरुद्ध पनि मुद्दा दायर गरिएको हो । अधिकृत सहितका कर्मचारीहरुले जग्गा लिने र दिने व्यक्तिको यकिन नगरी वकस पत्रको लिखत तयार र पारित गरी ३१ लाख ४५ हजार रुपैया बराबरको जग्गा गैरकानूनी तरिकाले मृत्यु भइसकेकी रनमायाको जग्गा रत्नदेवीको नाममा हस्तान्तरण गरेको अख्तियारको दाबी छ ।
अख्तियारले गैरकानुनी तरिकाले हक नपुग्ने रत्नदेवी लिम्बुलाई हक हस्तान्तरण गरी गैरकानूनी लाभ पु¥याएको ठहर गर्दै अधिकृत गुरागाई, नासु घिमिरे, खरिदार भट्टराई विरुद्ध भ्रष्टाचार निवारण ऐन, २०५९ को दफा ९ बमोजिम कैद सजाय र जरिवाना हुन माग गरेको छ ।
त्यसैगरी ईटहरी उपमहानगरपालिका सुनसरीका शाखा अधिकृत धिमालले जग्गाधनी स्वयम उपस्थित नभई नै निजको नाममा घरबाटो सिफारिस गरी गैरकानूनी रुपमा जग्गा हस्तान्तरण कार्यमा मतियारको भूमिका निर्वाह गरेको लेखापढी व्यवसायी पोखरेलले जग्गाधनी व्यक्ति स्वयम उपस्थित नहुँदै निजको नामको लिखत लेखी झुठा सहिछाप सहित लिखत तयार गरी अंशियारको हक मास्ने र रत्नदेवी लिम्बुले लाभ पाउने गरी गलत लिखत तयार गरी मालपोत कार्यालयमा पेश गरेको आरोपमा मुद्दा अख्तियारले मुद्दा दायर गरेको हो ।
अर्काको जग्गा गैरकानूनी रुपमा हतियाउने आरोपित रत्नदेवीले विरुद्ध मृत्यु भइसकेका व्यक्तिको नाममा गलत कागजात बनाई झुठा औठाछाप गरी आफ्नो नाममा जग्गा कायम गराएको र उक्त जग्गा आफ्नो नाममा दर्ता गराउन २ लाख ३५ हजार रुपैया रकम बुझाएको तर राजश्वमा ४७ हजार १ सय ७५ मात्र दाखिला भएको देखिएको बाँकी रुपैया कर्मचारीलाई घुस दिएको देखिएको अख्तियारको भनाई छ ।
निज विरुद्ध गैरकानूनी रुपमा जग्गा हतियाएको आरोपमा भ्रष्टाचार निवारण ऐन, २०५९ को दफा ३ को उपदफा (१) को देहाय (घ) र कर्मचारीलाई भ्रष्टाचार गर्न लगाएको आरोपमा सोही ऐनको दफा ८ को उपदफा (४) बमोजिम जरिवाना र कैद सजाय मांग सहित मुद्दा अख्तियारले दर्ता गराएको हो ।
त्यस्तै गलत लिखतका साक्षी गोविन्द कोइराला विरुद्ध पनि झुठा लिखत पारित गर्ने काममा साक्षी बसी मतियारको काम गरेको भन्दै मुद्दा दायर गरिएको हो ।
यो विषयमा आफ्नो प्रतिक्रिया दिनुहोस् !