लोक समाचारदाता
जनकपुरधाम, माघ २७ गते ।
आउँदो फागुन १ गतेदेखि धनुषामा दादुरा रुबेला खोप अभियान संचालन हुने भएको छ ।
सोमवार जिल्ला खोप समन्वय समिति स्वास्थ्य कार्यालय धनुषाले एक पत्रकार सम्मेलन आयोजना गरी फागुन १ गतेदेखि ३० गतेसम्म तीन चरणमा दादुरा रुबेला र पोलियो खोप अभियान संचालन हुने जानकारी गराएको छ ।
पुर्ण खोप रहित बनाउने गरी संचालन हुने सो अभियान अन्तर्गत करीब ९५ प्रतिशत लक्षित बालबालिकालाई समेटिने दाबी गरिएको छ । ९ महिनादेखि ५ वर्ष उमेरसम्मका १ लाख १५ हजार ७ सय ७० र ० उमेरदेखि ५ वर्षसम्मका १ लाख ३६ हजार २ सय ३५ बालबालिकालाई पोलियो खोप खुवाउने लक्ष्य लिइएको जनाइएको छ ।
फागुन १ देखि ९ गतेसम्म पहिलो चरणमा धनौजी, जनकनन्दनी र औरही गाउँपालिका, विदेह, कमला, धनुषाधाम, शहीदनगर सबैला र मिथिलाबिहारी नगरपालिकामा कार्यक्रम संचालन गरिने भएको छ ।
दोश्रो चरण फागुन १५ देखि २३ गतेसम्म जिल्लाका मुखियापटी मुसहरनिया, लक्ष्मिनिया, बटेश्वर गाउँपालिका, नगराईन, हंसपुर, क्षिरेश्वरनाथ, मिथिला र गणेशमान चारनाथ नगरपालिकाका साथै जनकपुरधाम उपमहानगरपालिकाका वडा नम्बर १७ देखि २५ सम्म संचालन हुनेछ ।
त्यसैगरी फागुन ३० गते तेश्रो चरणमा जनकपुरधाम उपमहानगरपालिकाका वडा नम्बर १ देखि १६ गतेसम्म खोप अभियान संचालन गरिने स्वास्थ्य कार्यालय धनुषाका प्रमुख इन्द्रप्रसाद यादवले जानकारी दिनु भयो ।
अभियानलाई सफल पार्न १ हजार २५ खोप केन्द्र संचालन गरिने भएको छ भने त्यसमा खटिने महिला स्वयंसेविका लगायत अन्य स्वास्थ्यकर्मीलाई खोप कसरी दिने भनी दुई दिने प्रशिक्षण समेत दिइएको छ । यसका साथै पालिकाहरुसंग छलफल र सुपरभिजनमा खटिनेहरुलाई एकदिने परामर्श समेत गरिएको उनले जानकारी दिए ।
यो विषयमा आफ्नो प्रतिक्रिया दिनुहोस् !