लोक समाचारदाता
जनकपुरधाम, माघ १२ गते ।
प्रदेश २ को स्थायी राजधानी जनकपुरधाम नै राख्नेमा दलहरु सर्वसम्मत भएको छ ।
सभामुख सरोजकुमार यादवको संयोजकत्वमा प्रदेशको नामाकरण र राजधानी टुंगो लगाउन गठित संसदीय विशेष समितिको बैठकबाट प्रदेशको स्थायी राजधानी जनकपुरधाम राख्ने सहमति जुटाएको छ ।
जनकपुरामलाई नै राजधानीको रुपमा कायम गर्ने निर्णय सर्वसम्मतिले पारित भएको समितिका संयोजक समेत रहेका सभामुख सरोजकुमार यादवले संचारकर्मीसँग कुरा गर्दै जानकारी दिएका छन ।
उनका अनुसार उत्तरमा धनुषाको मिथिला नगरपालिकाको ढल्केवर, दक्षिणमा भारतको सीमा तथा पूर्व र पश्चिमतर्फ मिथिला माध्यमिकी परिक्रमा क्षेत्रसम्म राजधानीको सिमाना तोक्ने सहमति भएको हो । समितिले टुंगो लगाएको राजधानी जनकपुर प्रदेशसभाको दुईतिहाई बहुमतले पारित गरेपछि राजधानीको औपचारिक रुपमा कायम हुनेछ ।
विभिन्न दलका प्रस्तावक तथा समर्थक, प्रस्तावका संशोधनकर्ता समेतलाई बोलाएर छलफल गरी उक्त निर्णयमा पुगिएको सभामुख यादवले बताउनु भएको छ । पारित भएको प्रस्ताव नेकपा, समाजवादी र राजपाले दर्ता गरेका थिए भने नेपाली कांग्रेसले जनकपुरधाम उपमहानगरपालिकाभित्र राजधानी हुनुपर्ने प्रस्ताव गरेको थियो ।
प्रदेशको राजाधानी र नाम सम्बन्धमा विभिन्न दलका सांसदहरूले प्रदेश सभामा भदौ ५ गते प्रस्ताव दर्ता गरेका थियो । प्रदेशको राजधानीको विषयमा विशेष समितिमा टुंगो लागेपनि नामको विषयमा सहमति हुन सकेको छैन । नामको टुंगो लगाउने विषयमा विशेष समितिमा छलफल भइरहेको सभामुख यादवले जनाएको छ ।
समितिमा उपसभामुख उपमा देव, नेपाली कांग्रेसका संसदीय दलका नेता रामसरोज यादव र सांसद नरेश यादव, समाजवादी पार्टीका प्रमुख सचेतक शैलेन्द्रकुमार यादव, नेकपाका संसदीय दलका नेता सत्यनारायण मण्डल, सांसद रामकुमार यादव, र संसदीय दलका उपनेता रामआशिष यादव, राजपा नेपालका प्रमुख सचेतक परमेश्वर साह र सांसद रानी शर्मा तिवारी तथा नेपाल संघीय समाजवादीकी सांसद सावित्रीदेवी साह सदस्य रहेका छन् ।
यो विषयमा आफ्नो प्रतिक्रिया दिनुहोस् !