लोक समाचारदाता
जनकपुरधाम, पुस १९ गते ।
आगामी माघ ९ गते हुने राष्ट्रिय सभा सदस्यको निर्वाचनका लागि राजपा र नेकपाबीच भएको दुई बुँदे सहमति पश्चात प्रमुख विपक्षी दल नेपाली काँग्रेस र समाजवादी पार्टीबीच चुनावी तालमेल गर्ने सहमति भएको छ ।
काँग्रेस सभापति शेरबहादुर देउवा निवास बूढानीलकण्ठमा दुवै दलका शीर्ष नेतृत्वबीच भएको छलफलले राष्ट्रियसभा सदस्य निर्वाचन अन्तर्गत प्रदेश नं २ मा चुनावी तालमेल गर्ने सहमति गरेको काँग्रेसका सहमहामन्त्री डा प्रकाशशरण महतले जनाएको छ ।
प्रदेश नं २ मा हुने चार पदको निर्वाचनमा काँग्रेसका तर्फबाट महिला र अलपसंख्यक तथा समाजवादी पार्टीका तर्फबाट दलित र अन्य पदमा उम्मेदवारी दिने दुवै दलबीच सहमति भएको हो ।
नेपालको संविधान अनुसार राष्ट्रियसभाका सदस्यहरूको पदावधि ६ वर्षको हुन्छ । संविधानको धारा, ८६ (३) बमोजिम प्रत्येक दुई वर्षमा पदावधि समाप्त भई रिक्त हुने राष्ट्रियसभाका एक तिहाइ सदस्यका लागि निर्वाचन हुन लागेको हो । स्थायी सदनका रुपमा रहेको राष्ट्रियसभामा ५९ सदस्यीय रहेको छ ।
यो विषयमा आफ्नो प्रतिक्रिया दिनुहोस् !