लोक सम्वाददाता
जनकपुरधाम, साउन १४ गते ।
प्रदेश २ का राजधानीको प्रमुख केन्द्र जनकपुर उपमहानगरपालिकाका दुई उपसचिव सहित ६ जनाविरुद्ध अख्तियार दुरुपयोग अनुसन्धान आयोगले भ्रष्टाचारको मुद्दा दायर गरेको छ ।
गएको आर्थिक वर्ष २०७४÷२०७५ मा विद्युतीय सामग्रीहरू खरिद गर्दा ११ लाख ३५ हजार ४ सय ११ रुपैयाँ अनियमितता गरेको आरोपमा तिनीहरु विरुद्ध विशेष विगो सहितको मुद्दा दायर गरेको हो ।
मंगलवार अख्तियारद्वारा जारी प्रेस विज्ञप्तिमा उपसचिव मदन घिमिरे, प्रमुख प्रशासकीय अधिकृत (उपसचिव) अधिकृत अर्जुन सुवेदी, शाखा अधिकृत ललनकुमार, लेखापाल दिनेश चौधरी, नायब सुब्बा अब्दुल जब्बार र सत्या इन्टरप्राइजेजका प्रोपराइटर मनिषकुमार मिश्र विरुद्ध भ्रष्टाचारको मुद्दा दायर गरिएको जनाइएको छ ।
प्रमुख प्रशासकीय अधिकृत सुवेदी समेतले सत्या इन्टरप्राइजेजका मिश्रसँग मिलेमतो गरी विद्युतिय सामाग्री खरीदमा भ्रष्टाचार गरेको पाइएको अख्तियारको अनुसन्धानले देखाएको छ ।
प्रवक्ता प्रदीप कोइरालाद्वारा जारी सो प्रेस विज्ञप्तिमा लिनेखाने दुषित मनसायले सुवेदीले मिश्रसंग मिलोमतो गरी एउटै व्यक्तिलाई तीन वटा फर्मको नाममा टेण्डर हाल्न लगाएर सत्याको दररेट स्वीकृत गरेको तथा प्रतिस्पर्धालाई सीमित बनाउन टेण्डर टुक्र्याएको तथा एउटै आर्थिक वर्षमा पटकपटक सीमाभन्दा बढी मूल्यमा स्वीकृत दररेटभन्दा बढी विद्युतीय सामग्रीहरू खरिद गरेको दाबी गरिएको छ ।
भ्रष्टाचार निवारण ऐन,२०५९ को दफा ८ को उपदफा (१) र दफा ८ को उपदफा (१) को देहाय (ञ) तथा ऐ.ऐनको दफा ८ को उपदफा (३) बमोजिमको कसुर अपराध गरेको आरोपित विरुद्ध पुष्टि भएको हुँदा निजहरूलाई भ्रष्टाचार निवारण ऐन,२०५९ को दफा ८ को उपदफा (१) तथा सोही ऐनको दफा ८ को उपदफा (३) बमोजिम सजाय गरी बिगोसमेत असुल उपर सहितको अख्तियारले मांग दाबी गरेको छ ।
सत्या इन्टरप्राइजेजका मिश्रले विद्युतिय सामाग्री खरिदमा अधिकृत सुवेदीलाई प्रभावमा पारी आपसी योजना, सहमति र संलग्नतामा बदनियतपूर्ण तवरले धनुषा जिल्लाले निर्धारण गरेको दररेटभन्दा बढी मूल्यमा सामग्रीहरूको दररेट स्वीकृत गर्न लगाई नेपाल सरकारलाई ११ लाख ३५ हजार ४ सय ११ रुपैया नोक्सानी गराएको हुंदा भ्रष्टाचार निवारण ऐन २०५९ को दफा ८ को उपदफा(४) बमोजिमको कसुर अपराध गरेको सप्रमाण पुष्टि भएको हुँदा निज मिश्रबाट विगो सहित सजाय गर्न आरोप गरिएको मुद्दामा भनिएको छ ।
जनकपुरधाम उपमहानगरपालिकाका अधिकृत सहित ६ जना भ्रष्टाचार मुद्दा दायर
नोट: लोकपुकार डटकममा प्रकाशित कुनैपनि सामाग्री बिना इजाजत लिई हुबहु वा आंशिक रुपमा कपी गरी प्रकाशन गरे विद्युतिय ऐन बमोजिम दण्डनीय अपराध मानिनेछ । यस किसिमको कार्य गरेको पाइएमा सम्बन्धित संचार माध्यम विरुद्ध हामी कानूनी उपचार खोज्न बाध्य हुनेछौ भनी सचेत गराउन चाहन्छौं ।
नेपाली, मैथिली र हिन्दी भाषाको यो देशकै पहिलो त्रैभाषिक डिजिटल पत्रिका हो । तपाईको सरोकार र चासोको विषयलाई समेटेर समाचारको रुपमा पस्किन लोकपुकार डटकम निरन्तर तयार रहनेछ ।….. विस्तृत
यो विषयमा आफ्नो प्रतिक्रिया दिनुहोस् !