जनकपुरधाम । मधेस प्रदेश सरकारबाट नेकपा एमाले बाहिरिएपछि नयाँ सरकार गठनको कसरतमा प्रतिपक्षी दलहरु जुटेका छन् ।
नयाँ सरकार गठन बारे प्रमुख प्रतिपक्षी दल जनता समाजवादी पार्टी नेपाल (जसपा), नेकपा एमाले र जनमत पार्टीबीच छलफल भएको बुझिएको छ । तीनै दलबिच नयाँ गठबन्धन बनाएर सरकार गठन गर्ने विषयमा सकारात्मक छलफल भएको नेताहरूले बताएका छन् ।
वर्तमान सरकारले विगतमा भएका सहमति कार्यान्वयन नगरेको र जनताले पनि सरकारको कामको अनुभूति गर्न नसकेको भन्दै एमालेले समर्थन फिर्ता लिएको मधेस प्रदेश संसदीय दलका नेता सरोजकुमार यादवले बताए । अब अन्य दलसँग मिलेर नयाँ सरकार गठन गर्ने प्रयासमा एमाले जुटेको उनले भने ।
एमाले संसदीय दलका नेता समेत रहेका सरोजले कृष्णप्रसाद यादव नेतृत्वको सरकारमा चार–पाँच महिना सहभागी हुँदा पनि सहमति कार्यान्वयन नभएकाले सरकारबाट बाहिरिनु परेको बताएका छन् ।
उनले भने, ‘हामीले चार–पाँच महिना सरकारमा बसेर काम ग¥यौँ । तर, उहाँहरूले गरेको सहमति कार्यान्वयन गर्न मान्नुभएन । हामीकहाँ पनि सरकारको कामलाई लिएर जनताका गुनासा आइरहेकाले समर्थन फिर्ता लिन बाध्य भयौँ ।’
नयाँ सरकार गठनका विषयमा पार्टी अध्यक्ष केपी शर्मा ओली र जसपा नेपालका अध्यक्ष उपेन्द्र यादवबिच केन्द्रमा एक चरणको छलफल भइसकेको र उक्त छलफल सकारात्मक भएको बताउँदै प्रदेश तहमा पनि जसपा तथा जनमत पार्टीसँग संवाद भइरहेको उने जानकारी दिएका छन् ।
उनका अनुसार जसपासँगै जनमत पार्टीसँग पनि सरकार गठनका विषयमा छलफल भएको र ती दलहरु एमालेसँग मिलेर सरकार बनाउन सकारात्मक रहेको छ । चाडपर्व सकिएपछि तीन दलबिच सहमति जुट्ने उनको दाबी छ ।
उनले संविधानको धारा १६८ को उपधारा (२) अनुसार सरकार गठनको प्रक्रिया अघि बढ्ने सम्भावनालाई ध्यानमा राखेर गृहकार्य भइरहेको बताए । उनका अनुसार प्रदेशको राजनीतिमा सहमति गरेर पछि हट्ने प्रवृत्ति देखिएकाले ठोस सहमति नहुँदासम्म अहिलेको छलफललाई अन्तिम निष्कर्षका रूपमा लिन सकिँदैन ।
नेतृत्वमा जसपको दाबी
यता, जसपा नेपालका संसदीय दलका नेता सरोजकुमार यादवले पनि नयाँ सरकार गठनका लागि एमाले र जनमत पार्टीसँग छलफल भइरहेको जानकारी दिएका छन् । उनका अनुसार तीनै दलका अध्यक्षबिच केन्द्रबाटै सहमति जुटाउने प्रयास भइरहेको छ । आगामी केही दिनभित्र सरकार गठनको विषय टुंगिने उनको भनाई छ ।
वर्तमान सरकार २९ गतेसम्म कायम रहने र त्यसअघि नै तीन दलका अध्यक्षबिच छलफल गरेर सरकार गठनबारे सहमति जुटाउने प्रयासमा रहेको उनले बताए । उनले भने ‘हाम्रा राष्ट्रिय अध्यक्ष अहिले विराटनगर जानुभएको छ । उहाँ काठमाडौँ फर्किएलगत्तै सरकार गठनका विषयमा सहमति जुटाउने प्रयास भइरहेको छ ।’
गत असोज ३० गते नेकपा एमाले तीनदलीय गठबन्धन सरकारबाट बाहिरिएपछि मधेस प्रदेश सरकार अल्पमतमा परेको छ । यद्यपि, नेपाल कम्युनिस्ट पार्टी (नेकपा) ले सरकारलाई दिएको समर्थन भने फिर्ता लिएको छैन । १०७ सदस्यीय मधेस प्रदेशसभामा सरकार गठनका लागि कम्तीमा ५४ सांसदको समर्थन आवश्यक पर्नेछ ।
प्रदेशसभामा नेपाली कांग्रेसका २२, नेकपा एमालेका २३, जसपा नेपालका २७, नेपाली कम्युनिस्ट पार्टीका १५ र जनमत पार्टीका १२ सांसद छन् । त्यस्तै, संघीय समाजवादी पार्टी र राष्ट्रिय प्रजातन्त्र पार्टीका एक–एक सांसद छन् । यो सिट संख्याका आधारमा एमाले, जसपा र जनमत पार्टीबिच सहमति भए उनीहरूको कुल संख्या ६२ पुग्छ । यो संख्या सरकार गठनका लागि आवश्यक बहुमतभन्दा बढी छ ।
यो विषयमा आफ्नो प्रतिक्रिया दिनुहोस् !