जनकपुरधाम । रौतहटको गुजरा नगरपालिकामा शुक्रबार बिहान खुकुरी प्रहारबाट एक महिलाको हत्या भएको छ।
जिल्ला प्रहरी कार्यालय रौतहटका अनुसार शुक्रबार बिहान करिब साढे १० बजे गुजरा नगरपालिका–५ हरिहरपुर टोल निवासी चन्देश्वर साह कलवारकी करिब ४० वर्षीया श्रीमती रेनु देवी जयसवालमाथि धारिलो हतियार (खुकुरी) प्रहार गरिएको थियो। आक्रमणबाट उनकाे घटनास्थलमै मृत्यु भएको प्रहरीले जनाएको छ।
हत्याको आरोपमा बारा जिल्लाको करैयामाई गाउँपालिका–८, इटहर बेलाही टोल घर भई हाल सोही क्षेत्रमा बसोबास गर्दै आएका करिब ३५ वर्षीय उपेन्द्र साह कलवारलाई प्रहरीले पक्राउ गरेको हाे ।
घटनापछि आक्रोशित स्थानीय बासिन्दाले उपेन्द्रलाई नियन्त्रणमा लिएर कुटपिट गरेका थिए। घटनास्थलमा प्रहरी टोली समयमै पुगेकाले उनलाई थप आक्रमणबाट जोगाउँदै नियन्त्रणमा लिन सफल भएको बताइएको छ।
स्थानीयको कुटाइबाट गम्भीर घाइते भएका उपेन्द्रको चन्द्रनिगाहपुरस्थित चन्द्रपुर अस्पतालमा कडा सुरक्षा व्यवस्थाका बीच उपचार भइरहेको जिल्ला प्रहरी कार्यालय रौतहटले जनाएको छ।
प्रहरीले घटनास्थलको मुचुल्का उठाउने, प्रमाण संकलन गर्ने तथा आवश्यक कानुनी प्रक्रिया अगाडि बढाउने काम जारी रहेको जनाएको छ। घटनामा प्रयोग भएको खुकुरीसहित अन्य प्रमाणहरू संकलन गरेर अनुसन्धान भइरहेको प्रहरीले जानकारी दिएको छ।
हालसम्म हत्या हुनुको कारण खुल्न नसकेको र घटनाका सबै पक्षबारे अनुसन्धान भइरहेको प्रहरीले जनाएको छ। प्रारम्भिक जानकारीअनुसार मृतक रेनु देवी जयसवालका श्रीमान रोजगारीका लागि काठमाडौंमा रहेको खुलेको छ।
प्रहरीले घटनासम्बन्धी थप तथ्य संकलन तथा अनुसन्धान जारी रहेको जनाएको छ।
यो विषयमा आफ्नो प्रतिक्रिया दिनुहोस् !