जनकपुरधाम । सामुदायिक विद्यालयहरूमा आवश्यक भौतिक पूर्वाधार र दरबन्दीअनुसार शिक्षक अभावले पठनपाठन प्रभावित भइरहेको भन्दै मधेश प्रदेशका प्रधानाध्यापकहरूले सरकारसँग ठोस पहलको माग गरेका छन्।
प्रधानाध्यापक संघ नेपालको आयोजनामा जनकपुरधाममा आइतबार सम्पन्न ‘सार्वजनिक शिक्षा रूपान्तरणमा विद्यालय नेतृत्व, स्थानीय सरकार र नीति निर्माणमा साझेदारी’ विषयक प्रदेशस्तरीय कार्यक्रममा सहभागी प्रधानाध्यापकहरूले विद्यालय सञ्चालनका क्रममा भोगिरहेका विभिन्न समस्या सार्वजनिक गरेका हुन्।
उनीहरूले विद्यालयको व्यवस्थापनदेखि शैक्षिक गुणस्तर कायम गर्ने जिम्मेवारी अधिकांश अवस्थामा प्रधानाध्यापककै काँधमा पर्ने गरेको उल्लेख गर्दै आवश्यक स्रोत–साधन, जनशक्ति र नीतिगत सहयोग अभावका कारण काम गर्न कठिनाइ भइरहेको बताए।
साथै अभिभावक र स्थानीय तहबाट अपेक्षित सहयोग नपाउँदा विद्यालय सुधारका प्रयासहरू प्रभावकारी बन्न नसकेको उनीहरूको भनाइ थियो।
कार्यक्रममा विभिन्न जिल्लाबाट आएका प्रधानाध्यापकहरूले आफ्नो विद्यालयमा लागू गरिएका सफल अभ्यास, नवप्रयोग तथा शैक्षिक सुधारका अनुभव पनि एकअर्कासँग आदान–प्रदान गरेका थिए। उनीहरूले विद्यालयलाई आकर्षक र गुणस्तरीय बनाउने प्रयासलाई संस्थागत रूपमा विस्तार गर्नुपर्नेमा जोड दिएका थिए।
शिक्षा तथा खेलकुद मन्त्रालयका सल्लाहकार शैलेन्द्र झाले विद्यालय र अभिभावकबीचको सम्बन्धलाई थप प्रभावकारी बनाउन मन्त्रालयले नयाँ प्रणाली विकास गर्ने तयारी गरिरहेको जानकारी दिए। उनले प्रधानाध्यापकहरूले पनि नेतृत्व क्षमता, व्यवस्थापन शैली र उत्तरदायित्वमा निरन्तर सुधार गर्दै अघि बढ्नुपर्ने धारणा राखे।
विद्यार्थीहरूको सिकाइ उपलब्धि अझै सन्तोषजनक बन्न नसकेको उल्लेख गर्दै उनले शिक्षक, अभिभावक, विद्यालय नेतृत्व र स्थानीय सरकारबीच प्रभावकारी सहकार्य भए मात्र सार्वजनिक शिक्षाको गुणस्तर उकास्न सकिने बताए।
प्रधानाध्यापक संघ नेपालका अध्यक्ष सुदान प्रसाद गौतमले शिक्षा क्षेत्र अझै राज्यको प्राथमिकतामा पर्न नसकेको टिप्पणी गर्दै पर्याप्त बजेट, स्पष्ट नीति र प्रभावकारी कार्यान्वयन सुनिश्चित गर्न सरकारमाथि निरन्तर दबाब आवश्यक रहेको बताए।
विकसित राष्ट्रहरूले शिक्षालाई विकासको आधारका रूपमा लिने गरेको उल्लेख गर्दै उनले शिक्षा, स्वास्थ्य र पूर्वाधारजस्ता आधारभूत सेवाको सुनिश्चितता राज्यको प्रमुख दायित्व भएको धारणा व्यक्त गरे।
संघका मधेश प्रदेश अध्यक्ष संजय झाको अध्यक्षतामा सम्पन्न कार्यक्रममा सार्वजनिक शिक्षाको गुणस्तर अभिवृद्धि, विद्यालय नेतृत्व सुदृढीकरण, स्थानीय सरकारसँगको समन्वय तथा शिक्षा नीति कार्यान्वयनमा देखिएका चुनौती र सम्भावित समाधानबारे विस्तृत छलफल भएको थियो।
कार्यक्रममा मधेश प्रदेशका विभिन्न जिल्लाबाट संघमा आबद्ध प्रधानाध्यापकहरूको सहभागिता रहेको थियो।
यो विषयमा आफ्नो प्रतिक्रिया दिनुहोस् !