जनकपुरधाम, अवैध घरेलु मदिरा सेवनले एक दर्जनभन्दा बढीको मृत्यु भएको घटनामा मदिरा सप्लायर्स सहित ७ जनालाई प्रहरीले पक्राउ गरेको छ ।
एक साता भित्र फागुन २९ गतेदेखि चैत १ गतेसम्म अवैध घरेलु मदिरा सेवनले धनुषाको क्षिरेश्वरनाथ नगरपालिका १ र २ को रमदैयामा मृत्यु भएको घटनाको अनुसन्धानको क्रममा धनुषा प्रहरीले सप्लायर्स महोत्तरी जिल्ला भंगहा नगरपालिका ३ सखरी टोलका जगतनारायण मण्डल लगायतका व्यक्तिहरुलाई पक्राउ गरेको छ ।
अन्य पक्राउ पर्नेहरुमा अवैध घरेलु मदिरा विक्रेताहरु लक्ष्मिनिया गाउँपालिका ६ बगेवाका नवीन यादव, घुरन यादव, रमदैयाका तारापट्टीवाली भनिने छठिया देवी, जयकुमार यादव, रामनन्दन साह र जनकपुरधाम उपमहानगरपालिका १४ रजौलका शितल देवी यादव लगायतका रहेका छन ।
प्रहरीका अनुसार महोत्तरीको भंगहाबाट निर्मित अवैध घरेलु मदिरा जगतनारायण मार्फत विभिन्न ठाउँका साथै रमदैयामा समेत लुकिछिपी विक्री वितरण गरिदै आएको थियो । सोही मदिरा खाएर यति ठूलो संख्यामा व्यक्तिहरुको मृत्यु हुन गएको हो ।
भंगहामा निर्मित सो मदिरा ब्राण्डेड मदिरा कम्पनीको बोतलमा अवैध घरेलु मदिरा प्याक गरी विक्री वितरण गरिदै आएको थियो, सो मदिरा सेवन गर्दा तिनीहरुको मृत्यु हुन गएको हो ।
प्रहरीका जारी गरेको प्रेस विज्ञप्ति अनुसार अवैध घरेलु मदिरा सेवनले हालसम्म ८ जनाको मृत्यु र सिकिस्त ६ जना उपचारार्थ अवस्थामा रहेको छ । तर स्थानीयका अनुसार रमदैयामा १२ र जनकपुरधाम ३ जना गरी १५ जनाको मृत्यु भइसकेको छ ।
प्रहरीका अनुसार रमदैया १ का रामनारायण महरा वडा नं. २ का ब्रम्हदेव यादव, रामविलास मण्डल, गुदरी महरा, राजु महरा, इन्द्रजीत महरा, शत्रुध्न मण्डल, श्रीदेव यादव मृत्यु हुनेमा रहेका छन । त्यसैगरी रामईश्वर महरा, प्रदीप सादा, भरत मण्डल, मनिर नादाफ, भरत सादा र सीताराम यादव उपचारार्थ अवस्थामा रहेका छन ।
प्रहरीको रेकर्ड बाहेक यी हुन मृतक
प्रहरीले जारी गरेको मृतकको नामावली बाहेक स्थानीयले जनाए अनुसार फागुन २७ र २८ गते रमदैयाको मुसहर वस्तीका विजय सादा, रासमती सादा, झुरुक सादाको र चैत १ गते रंजित यादवको मृत्यु भएको हो ।
यसका साथै जनकपुरधाम उपमहानगरपालिका ७ मुसहरी टोलका बनारसी देवी सादा, झगरु सादा र मिथिला सादाको अवैध घरेलु मदिरा सेवनले मृत्यु भएको स्थानीयले जनाएको छ ।
घटनाको अनुसन्धान बारे प्रमुख जिल्ला अधिकारी प्रदीपराज कणेलले भंगहामा निर्मित अवैध मदिराको नमूना परिक्षणका लागि पठाइ सकिएको छ । कहाँ कहाँ सो मदिरा बिक्रीका लागि निर्यात गरिएको हो, त्यसको खोजबीन कार्य अघि बढाइ सकिएको जानकारी दिएको छ । उनले अनुसन्धानको क्रममा पक्राउ परेका आरोपितहरुको वर्गीकरण गरेर कानूनी सजायको प्रक्रिया अघि बढाइ सकिएको जानकारी समेत दिएका छन ।
प्रदेश सभामा अवैध घरेलु मदिराको चर्चा
शनिवार प्रदेश सभा २ को बसेको बैठकमा विशेष समयमा बोल्दै प्रदेश सभा सदस्यहरुले रमदैयामा अवैध घरेल मदिरा सेवनले मृत्यु भएको घटनाको छानबीन गरी दोषीलाई अविलम्ब कारवाही र पिडीत परिवारलाई काजक्रिया खर्च सहित आर्थिक सहयोगको मांग गरेका छन ।
प्रदेश सभा सदस्य शत्रुध्न महतोले भने कोरोना भाइरसभन्दा बढी घातक अहिले अवैध घरेलु मदिरा उत्पादन रहेको जसलाई नियन्त्रण गर्न प्रहरी प्रशासन र प्रदेश सरकार असक्षम रहेको छ । जसको परिणाम रमदैयामा १५ जनाको मृत्यु भइसकेको छ ।
उनले भने पिडीत परिवारलाई राहतका लागि कम्तिममा तत्कालका लागि क्रिया खर्च उपलब्ध गराउनुका साथै उनीको जीवन गुजर बसरका लागि आर्थिक सहयोग प्रदेश सरकारले गर्नु पर्दछ ।
त्यस्तै रामसरोज यादवले अवैध मदिरा सेवन उत्पादनकर्ता र विक्रेतालाई पक्राउ गरी कारवाही गर्नुपर्ने र पिडीत परिवार गरीब असहाय रहेको कारण तत्कालका लागि कम्तिमा क्रिया खर्च प्रदेश सरकारले उपलब्ध गराउनुपर्ने मांग गरे ।
उनले प्रहरी प्रशासनले नै पैसा लिएर अवैध घरेलु उत्पादनकर्ता र विक्रेतालाई संरक्षण दिदै आएको आरोप लगाउंदै त्यस्ता प्रहरीमाथि पनि छानबीन गरी कारवाही गर्नुपर्ने मांग गरे ।
यो विषयमा आफ्नो प्रतिक्रिया दिनुहोस् !