जनकपुरधाम, प्रदेश २ को स्थायी राजधानी र नामाकरणका लागि हुने निर्वाचन सम्बन्धी कार्यविधि तय गरिएको छ ।
बिहीवार प्रदेश सभामा सहभागी दलहरुको दलको प्रमुख सचेतकको उपस्थितिमा निर्वाचन सम्बन्धी कार्यविधि तय गर्ने उद्देश्यले बसेको बैठकबाट कार्यविधि र आचार संहिता तयार पारी सभामुख सरोजकुमार यादवलाई बुझाइएको छ ।
नेपाली कांग्रेसका प्रमुख सचेतक उपेन्द्र कुशवाहाको अध्यक्षतामा बसेको सो बैठकबाट तयार पारिएको कार्यविधिमा गोप्य मतदान प्रक्रिया र मतगणना लगायतका कुरा समेटिएको छ ।
यसका साथै मतदाताहरुले पालन गर्ने आचार संहिता समेत संवैधानिक व्यवस्था अनुसार तयार पारिएको र प्रदेश सभा सचिवालयका सचिव रंजित यादवलाई निर्वाचन अधिकृत तोकिएको कुरा राजपाका प्रमुख सचेतक परमेश्वर साहले जानकारी दिएका छन ।
शुक्रवार फागुन ३० गते बस्ने प्रदेश सभाको बैठकमा पछिल्लो पटक दलहरुले राजधानी र नामका लागि दर्ता गराएको प्रस्तावमा सहमति जुटाउने प्रयास गर्ने, सहमति नजुटेपछि सोही बैठकबाट तयार पारिएका कार्यविधि र आचार संहिता पारितका लागि पेश गरिने जनाइएको छ ।
प्रमुख सचेतकले तयार पारेको कार्यविधि र आचार संहिता पारित भएपछि चैत १ गते बिहान निर्वाचन गराउने प्रस्ताव समेत अघि बढाइने प्रमुख सचेतक उपेन्द्र कुशवाहाले जानकारी दिएका छन ।
प्रदेशको स्थायी राजधानीका लागि दलहरुबीच सभामुख यादव संयोजक रहेको विशेष समितिबाट टुंगो लगाइएपनि निर्वाचन प्रक्रियाबाट नै पारित गराउने कार्य सम्पादन समितिको पछिल्लो बैठकबाट निर्णयानुसार मतदान नै हुने भएको छ ।
प्रदेशको नाममा दलहरुबीच विशेष समितिको अथक प्रयासका बावजूद सहमति जुटन नसकेपछि अन्ततः गोप्य मतदानबाट नै टुंगो लगाउने कार्य सम्पादन समितिको बैठक निर्णय गरिएको थियो ।
सत्तारुढ दल मधेश प्रदेश, प्रमुख प्रतिपक्षी दल नेकपाले जानकी प्रदेश र प्रतिपक्षी कांग्रेसले मिथिला प्रदेशको प्रस्ताव दर्ता गराएको थियो । विशेष समितिको बैठकमा प्रतिपक्षी दलहरुले लचकता अपनाउंदै नेकपाले जानकी मधेश र कांग्रेसले मिथिला भोजपुरा मधेश प्रदेश राख्ने निर्णय पुगेको थियो ।
यो विषयमा आफ्नो प्रतिक्रिया दिनुहोस् !