लोक समाचारदाता
जनकपुरधाम, माघ ९ गते ।
प्रदेश २ मा जारी राष्ट्रिय सभा सदस्यको मतदान स्थल भित्र मोबाइल फोन निषेध गरिएपनि सुरक्षामा खटिएका प्रहरीले कानूनको धज्जी उडाउंदै मोबाइल लगेको पाइएको छ ।
मतदानको गोपनीयता र सुरक्षाको दृष्टिगत गर्दै प्रहरीले मतदान स्थलमा मोबाइल फोन प्रवेशमा निषेध गरेको थियो । मतदातालाई मोबाइल फोन चेक गर्नका लागि मतदान स्थलको मुख्यद्वारमै अत्याधुनिक मेसिन सहित दर्जनौको संख्यामा प्रहरी खटाइएपनि प्रहरी आफै मोबाइल भित्र लगेर कानूनको उल्लंघन गरेको हो ।
जनकपुरधामस्थित महेन्द्रनारायण निधि सांस्कृतिक प्रतिष्ठानमा जारी मतदान केन्द्रमा खुलेआम रुपमा प्रहरी निरिक्षक विजय यादव मोबाइलमा कुराकानी गरिरहेको दृष्य फोटोमा प्रष्टै देखिन सकिनेछ ।
प्रहरी निरिक्षक यादवले पहिला आफै मोबाइलमा कसैसंग कुरा गरे त्यसपछि मतदाता रहेका एकजना महिलालाई पनि कसैसँग कुराकानी गराएका छन । मतदान स्थलमा निर्वाचन अधिकृत र मतदान अधिकृत बाहेक मतदातालाई मात्रै होइन सुरक्षामा खटिएका प्रहरी र संचारकर्मीको मोबाइलमा समेत प्रवेश निषेध गरिएको थियो ।
मतदान गोप्य हुने भएकाले गोपनियताको लागि यस्तो गरिएको निर्वाचन आयोगले जनाएको छ । प्रदेश २ मा मात्रै होइन देशका ७ वटै प्रदेशका मतदान स्थलमा मोबाइल फोन निषेध गरेको हो ।
यो विषयमा आफ्नो प्रतिक्रिया दिनुहोस् !