जनकपुरधाम, असोज ३ गते । जेन-जी नाममा प्रदर्शनकारीहरुले गरेको आन्दाेलनकाे क्रममा मधेश प्रदेशमा लुटपाट, आगजनी तथा तोडफोड गरि नष्ट गरिएका संरचनाहरू पुनर्निर्माणबारे प्रदेश सरकारकाे उच्चस्तरीय टोलीले निरीक्षण गरेको छ ।
प्रदेश प्रमुख सुमित्रा सुवेदी भण्डारी, मुख्यमन्त्री सतिश कुमार सिंह र सभामुख रामचन्द्र मण्डलसहितको टोलीले साे निरीक्षण गरेका हुन् ।
टोलीले प्रदर्शनकारीले लुटपाट, तोडफोड र आगजनीले नष्ट भएका संरचनाकाे मूल्यांकन गरि पुननिर्बारे गरेको क्षतिको जानकारी तथा मूल्यांकन गर्न स्थलगत निरिक्षण गरेको छ । ती टोलीले प्रदेशसभा सचिवालय, प्रदेश प्रमुखको कार्यालय, मुख्यमन्त्री तथा मन्त्रिपरिषद्को कार्यालय, विभिन्न मन्त्रालय र अन्य सरकारी कार्यालयका भवन तथा मन्त्री तथा नेताहरुको घरमा पुगेर निरीक्षण गरेका हुन् ।
यसैक्रममा नेपाली कांग्रेसका सह महामन्त्री एवं पुर्व खानेपानी मन्त्री महेन्द्र यादव र प्रदेश सरकारका ऊर्जा, सिचाई तथा खानेपानी मन्त्री शेषनारायण यादवको जनकपुरधाम १३ स्थित घरमा पुगेर सो टोलीले निरिक्षण गरेका हुन ।
प्रदर्शनकारीले गरेको लुटपाट, तोडफोड तथा आगजानीले मधेश सरकारका मुख्यमन्त्री तथा मन्त्रिपरिषदको कार्यालय, प्रदेश सभा, भौतिक पुर्वाधार विकास मन्त्रालय, श्रम तथा यातायात मन्त्रालय र ऊर्जा, सिचाई तथा खानेपानी मन्त्री, शिक्षा तथा संस्कृति मन्त्रालय र भूमिव्यवस्था, कृषि तथा सहकारी मन्त्रालय पूर्ण रुपमा जलेर नष्ट भई व्यापक क्षति पुगेको छ ।
आगलागीले भौतिक पूर्वाधार विकास र श्रम तथा यातायात मन्त्रालयका सचिव बस्ने कोठा, लेखा, प्रशासन लगायतका शाखाहरु, शिक्षा तथा संस्कृति मन्त्रालयका मन्त्री र सचिव बस्ने कोठासहित सम्पूर्ण शाखा, ऊर्जा, सिचाई तथा खानेपानी मन्त्रालयका सिचाई तथा खानेपानी महाशाखा पूर्ण रुपमा जलेर नष्ट भएको छ ।
यस्तै प्रदर्शनकारीहरुले गरेको तोडफोड तथा आगजानीबाट कांग्रेस सहमहामन्त्री यादवको घरको झ्यालका सिसाहरु, घर भित्रका दराज, ढोका, झ्याल तथा अन्य फर्निचतहरु तोडफोड र फुटाउनुका साथै एउटा मोटरसाइकल र एक कोठामा आगजानी गरेका छन ।
यता ऊर्जा, सिचाई तथा खानेपानी मन्त्री यादवको तीन तल्ले घर पूर्ण रुपमा जलेर नष्ट भएको छ । घरको झ्याल, ढोका, सोफा, दराज, टेबल लगायतका फर्निचर जलाएर नष्ट पारिएको छ भने नगद लाखौ रुपैया, कम्प्यूटर, प्रिन्टर, ल्यापटप र गरगहनाहरु लुटेर प्रदर्शनमा सहभागी गलत तत्वहरुले लगेका छन् ।
प्रदर्शनकारीहरुले कांग्रेस नेता विमलेन्द्र निधि, जसपा नेपाल प्रदेश सांसद रामआशिष यादव, सुरिता साह र एमालेका निलम्बित सांसद दिपेन्द्र ठाकुर र एमाले सचिव रघुवीर महासेठ लगायतका नेताहरुको जनकपुरधामस्थित घरमा समेत लुटपाट र तोडफोडसहित आगजानी गरेका थिए ।
जनकपुरधाम उपमहानगरपालिका सहित वन कार्यालय, आन्तरिक राजश्व कार्यालय, यातायात कार्यालय, कोलेनिका र जिल्ला प्रशासन कार्यालयसहित नगरभित्रका प्रमुख प्रहरी चाैकीहरुमा समेत प्रदर्शनकारीहरूले तोडपोड तथा आगजानी गरेको थियो ।
यो विषयमा आफ्नो प्रतिक्रिया दिनुहोस् !